IQEMBU lebhola, iRoyal AM, selizoyidlalela eHarry Gwala Stadium imidlalo yalo yasekhaya.
Lokhu kuza emva kokuthi uMasipala waseMsunduzi unqume ukulixhasa leli qembu.
Isinqumo sokuxhaswa kweRoyal AM sithathwe emhlanganweni wesigungu esiphezulu kuMasipala waseMsunduzi obungoLwesithathu.
UMasipala waseMsunduzi uzoxhasa iRoyal AM ngo-R9 million ngonyaka.
IRoyal AM ibikade iyidlalela eChatsworth Stadium imidlalo yayo yasekhaya.
IMenenja kaMasipala waseMsunduzi, uMnuz Lulamile Mapholoba, ithe banqume ukuthungatha iqembu elizodlalela imidlalo yasekhaya eHarry Gwala emva kokudliwa yizembe kweMaritzbrg United okuyiyo ebisebenzisa le nkundla.
“Besingafuni ukuthi inkundla iHarry Gwala isale dengwane.”
Amaqembu aphikisayo akuhlabile ukuxhaswa kweRoyal AM.
Umhlangano womkhandlu ongoLwesithathu ntambama yiwona ozothatha isinqumo sokugcina mayelana nokuxhaswa kweRoyal AM.