UZOVELA eNkantolo yeMantshi yaseVerulam namhlanje osolwa ngokushushumbisa izidakamizwa.
Kuvela ukuthi ngoMgqibelo amalungu ophiko lwamaphoyisa aphenya amacala abucayi ahleliwe eThekwini, ebambisene nawezobuNhloli nawokuvikela ubugebengu esikhumulweni sezindiza, iKing Shaka, abophe umsolwa oneminyaka engu-55 ngokushushumbisa izidakamizwa.
Kubikwa ukuthi athole imininingwane kwabezobuNhloli ngomsolwa obephuma eGoli eya esikhumulweni sezindiza, iKing Shaka International.
Emva kokuthi kwenziwe uphenyo, kutholakale ukuthi umsolwa ubesesikhumulweni sezindiza elindele ukuthi alibhekise ePhillipines.
Kube sekuseshwa imithwalo yakhe kwatholakala i-cocaine engu-6.38 kilogram engabiza u-R2.2 million uma idayiswa emgwaqweni, ifihliwe esikhwameni sakhe.
Ube eseboshwa wabekwa icala lokushushumbisa izidakamizwa nokutholakala nazo.