UMSUNGULI we-IFP, iNkosi Mangosuthu Buthelezi, usezigxekile izigameko zokuhlaselwa kwezitolo okuqhubekayo ezindaweni ezihlukene KwaZulu-Natal naseGauteng.
Ekhuluma ne-eNCA ngoLwesibili, uButhelezi usole uhulumeni ngokuhudula izinyawo odabeni lokutshala amasosha ukuze kunqandwe lezi zigameko.
“Kumele sikugxeke ngayo yonke indlela okwenzeka ezweni lethu ngoba uma singenzi lutho, lizoshabalala. Kungiphula inhliziyo ukubona izwe libhujiswa kanje,” kusho uButhelezi.
Ukuhlaselwa kwezitolo kulandela izikhalo zokuthi kukhululwe lowo owayengumengameli wakuleli, uMnuz Jacob Zuma
UShenge, obuye abe nguNdunankulu kaZulu, uphinde wagxeka uMengameli Cyril Ramaphosa ngokufaka ubuhlanga kulolu daba njengoba ethe abenza lezi zinto badudana ngobuhlanga.
“Angazi ukuthi ubeqonde ukuthini uma ethi abantu bahlanganiswe ubuhlanga ngoba kunabantu abavela kwezinye izifundazwe abeseka lowo owayengumengameli wakuleli. Uma ubuka nje, uMnuz Ace Magashule akayena umZulu, abaholi baseMpumalanga akubona bonke abangamaZulu ngakho-ke angiboni kahle ukuthi ubeqonde ukuthini,” usho kanje.
UButhelezi uphinde washayela ihlombe ubuholi basoLundi ngokuqinisekisa ukuthi azikho izitolo ezihlaselwayo selokhe kuqale lezi zibhelu.
Ugqugquzele abantu ukuthi bavikele ingqalasizinda yomphakathi namabhizinisi abo.