I-DA kuMasipala wakubaQulusi ifuna kubuyekezwe isinqumo somkhandlu esaholela ekutheni abaholi balo mkhandlu bangathathelwa izinyathelo yize uphenyo lwaluthole ubufakazi bokuthi kukhona imithetho abayiphula.
I-DA ifuna umasipala ubuyekeze isinqumo sawo esachitha umbiko wekomiti lokuziphatha elaliphenya owayeyimeya ngaleso sikhathi, uMnuz Mncedisi Maphisa, owayeyiphini lemeya ngaleso sikhathi, uMnuz Mandla Mazibuko kanye nosomlomo, uMnuz Michael “Mkhonyovu” Khumalo.
Phakathi kwezinsolo ezaziphenywa yikomiti, izinsolo zokuthi uMaphisa wandisa isibalo sabaqaphi bakhe ngaphandle kwemvume yomkhandlu.
Leli komiti beliphenya nezinsolo zokuthi umkhandlu wawusebenzisa imali enkulu ukuqashela uMaphisa noMazibuko izimoto ababehamba ngazo ngaleso sikhathi.
NgoDisemba umhlangano womkhandlu wanquma ukuthi uchithwe umbiko wekomiti.
Manje ikhansela leDA kulo masipala, uMnuz Swelakhe Shelembe, lifuna ukuthi kubuyekezwe lesi sinqumo.
UShelembe usebhalele uKhumalo emcela ukuthi udaba lokubuyekezwa kwalesi sinqumo alufake ezindabeni ezizodingidwa emhlanganweni womkhandlu ozokuba ngesonto elizayo.
Encwadini ebonwe yiSolezwe, uShelembe uthe kwakungafanele uchithwe umbiko.
“Lo mbiko uqukethe ubufakazi obukhombisa ukungaziphathi kahle kwamakhansela athintekayo okukhona kukho ukungalandeli imithetho elawula ukuhlinzekwa ngabaqaphi kanye nokuqasha imoto ngaphandle kokulandela imithetho.”
UShelembe ukuqinisekisile ukuthi usebhalele uKhumalo, wakhala ngokuthi ubengakayitholi impendulo.
“UKhumalo ngimbhalele incwadi cishe emasontweni amabili edlule kodwa kuze kube manje angikaze ngiyithole impendulo. Ukungaphenduli kukaKhumalo kwenza ukuthi sibone sengathi akaliphethe ngendlela ihhovisi lakhe. Yena njengosomlomo kufanele abheke zonke izinto ezifika ehhovisi lakhe. Njengoba engakaphenduli kuze kube manje sibona sengathi ubalekela ukuwufaka ezindabeni ezizoxoxwa ngesonto elizayo lo mbiko.”
Isolezwe liphinde lathola ukuthi ikomiti ebeliphenya uMaphisa ngezinsolo zokungaziphathi kahle kulandela ukusabalala kwenkulumo yakhe eqoshiwe lapho ezwakala eqoshamisa amagama emhlanganweni nabasebenzi bomkhandlu, seluwuphothulile umbiko walo.
UMaphisa wehliswa esikhundleni emva kokusabalala kwale nkulumo, umasipala wabe usuqala uphenyo.
Njengamanje kubambe uMazibuko kwesemeya.
Leli komiti ebeliholwa uShelembe libhalele uKhumalo limcela ukuthi alivumele lethule umbiko walo emhlanganweni womkhandlu olandelayo, lokhu kuqinisekiswe uShelembe.
UShelembe uthe kubalulekile ukuthi umbiko usheshe wethulwe.
Imizamo yokuthola ukuphawula kukaKhumalo ayizange iphumelele njengoba ucingo lwakhe belukhala lungabanjwa.