BASHAYELWE ihlombe othisha bazikole zakwaHlabisa, ngeqhaza lokuqhakambisa ulimi lwebele ezinganeni zesikole. Lokho kubonakale ngemiphumela yabafundi bakamatric abagile izimanga esiZulwini.
Lokhu kugqame kuleli sonto ngesikhathi kuklonyeliswa abafundi baka-matric basezikoleni ezakhele iBig 5 Hlabisa, emcimbini obusehholo laseMakhasa, eHluhluwe.
Abafundi abaningi bathole o100% ezifundweni, okubalwa IsiNgisi, Izibalo, isiZulu nezinye izifundo. Okuhlabe umxhwele kube ukuzinikela kwabo esifundweni sesiZulu, njengoba kuliwa nokuthi ulimi lwebele lungashabalali ezikoleni.
Phakathi kothisha abadle ubhedu kubalwa uNkk Lungile Bhengani ofundisa eMmisi High, uNksz Nompumelelo Ntshaba waseMakhasa High, Nkk Fikile Mkhize waseMaguzu High nabanye.
Bephawula ngokwehlukana othisha, bagcizelele ukuthi bakubeka phambili ukuthi abafundi bahamba phambili olimini lwebele, ukuze bangakhohlwa yimvelaphi yabo futhi bangabi nenkinga ezindaweni zokusebenza ngenxa yokungalazi ulimi lwendabuko yabo.
UMengameli we-IFP noyilungu lesishayamthetho KwaZulu-Natal, okewafundisa ezikoleni zakwaHlabisa, uMnuz Velenkosini Hlabisa, uthe akuvamisile ukuthi othisha banconywe uma benze kahle kodwa uyakuthokozela ukuthi umasipala iHlabisa Big 5, unqume ukubatusa ngomsebenzi wabo omuhle.
Ucele ukuthi banatu bamfunise ingane azoyiqhuba yena enyuvesi ukuze yenze iziqu zokushayela amabhanoyi ngoba usekwazile ukufundisa enye eyenza izifundo zokuba yiStatitician futhi izothweswa iziqu kulo nyaka.
"Indawo yakithi eMkhanyakude ihlale ibukelwa phansi. Yikho ngo-2018 ngathatha isinqumo sokufundisa enye yezingane eyayiphase kahle ukuthi iyoba yiStatitician. Kumanje iqedile enyuvesi yaKwaZulu-Natal, kanti ihlela ukuba yenze iziqu zeHonours. Inhloso yami ukuthi sibe nabantu bemikhakha engandile eMkhanyakude. Yikho ngizicelela ukuba ngithole ingane engizoyiqhuba iyokwenza izifundo zokushayela amabhanoyi ukuze siqhubeke sihlonishwe kuleli lakithi," kuchaza uHlabisa.
IMeya yaseBig 5 Hlabisa, uMnuz Comfort Khumalo, ixwayise abafundi ukuba bakhohlwe izinto ezingabayisi ndawo kodwa bagxile ezifundweni zabo ukuze bangazisoli kusasa uma impilo isibashaya.
Uthe okumjabulisayo ukuthi ingxenye enkulu yabafundi abenze kahle ku-matric KwaZulu-Natal, baqhamuka eMkhanyakude nakwaHlabisa.
Abafundi baklonyeliswe uBig 5 Hlabisa ngamalaptop, isamba semali ewu-R10 000 nezinye izipho ngokunjalo nothisha.