KUKHALWA nkalo zonke ngokukhothama kwenkosi uKusakusa Mkhize obengumholi womkhandlu Isimahla, ebukhosini bakwaMkhize eMbo, eThekwini.
Inkosi ikhothame ngoLwesibili entathakusa ngemva kokudunguzela isikhashana.
Angene elakanyana amazwi enduduzo emndenini kaMkhize evela eMnyangweni wokuBusa ngokuBambisana neziNdaba zobuHoli boMdabu, kuMasipala weTheku naseqenjini i-IFP.
UNgqongqoshe uSipho Hlomuka uthe bashaqekile futhi badangele ngokukhothama kukaMkhize.
Udlulise amazwi enduduzo emndenini wenkosi nasemkhandlwini wamakhosi athe balahlekelwe wumholi obebeka phambili okufunwa wumphakathi.
“Indlu yobuHoli boMdabu ilahlekelwe ngumthombo wobuhlakani ngisho amakhosi asemasha afunde lukhulu kuwona. Kushiya isikhala ukukhothama kwakhe. Sidlulisa amazwi enduduzo kwiSilo ngokulahlekelwa wuMkhize obengumholi oqotho ohlanganise isizwe," kusho uHlomuka.
Kuthunyelwe abasebenzi bomnyango ukuyozimazisa umndeni wenkosi balekelele nangamalungiselelo okutshalwa kwayo.
IMeya yeTheku uMnuz Mxolisi Kaunda ithe idangele ngokukhothama kukaMkhize emchaze njengomuntu obekhuthalele intuthuko yomphakathi wasemakhaya.
Udlulise amazwi enduduzo emndenini, kubangani nasemkhandlwini wamakhosi.
“Silahlekelwe wumholi obezinikele, esekhaleni ekuhlinzekweni kwabantu baseThekwini ngentuthuko. Ubebeka izidingo zomphakathi phambili. Umphefumulo wakhe uphumule ngokuthula,” kusho uKaunda.
UMnuz Blessed Gwala, ongusihlalo we-IFP nobuye abe yilungu lesiShayamthetho, uthe iqembu lakhe lidangele ngokukhothama kukaMkhize amchaze njengenye yezinsika zobukhosi baKwaZulu ebisadla anhlamvana.
I-IFP ngomlomo kaGwala idlulise amazwi enduduzo ebukhosini bakwaMkhize abevela kowayengumengameli nomsunguli we-IFP ophinde abe nguNdunankulu waKwaZulu, inkosi Mangosuthu Buthelezi noMengameli weNkatha uMnuz Velenkosini Hlabisa.
UGwala uphinde wakhalisana neSilo samaBandla ngokudlula emhlabeni kwezinyane laso, uMntwana uLethukuthula Zulu.
“Sidlulisa amazwi enduduzo nakusihlalo wendlu yobukhosi KwaZulu-Natal inkosi Phathisizwe Chiliza nakuwona wonke amakhosi asendlunkulu,” kusho uGwala.
Uthe ukukhothama kwenkosi uMkhize kulandela okwenkosi uThamsanqa Mkhize waseMfeni naye obethandwa kakhulu, okhothame esikhathini esicishe sibe izinyanga eziyisithupha ezedlule.