Izogqunywa esitokisini indodana kaMugabe
UBellarmine Chatunga Mugabe noTobias Mugabe Matonhodze ngesikhathi bevele phambi kweMantshi yase-Alexandra.
Image: Itumeleng English/ Independent Newspapers
UBellarmine Mugabe, oyindodana yowayengumengameli waseZimbabwe, uRobert Mugabe, kanye nalowo asolwa naye, uTobias Matondzhe, basazogqunywa esitokisini njengoba kuqhubeka uphenyo ngecala labo lokuzama ukubulala.
Laba bavele kafushane eNkantolo yeMantshi yase-Alexandra ngoMsombuluko.
Babhekene namacala amaningi ahlobene nokudubula isisebenzi emzini kaMugabe eHyde Park ngesonto eledlule.
La macala avela esigamekweni sokudutshulwa kwesisebenzi esineminyaka engu-23 ubudala endaweni eHyde Park, sishiywe sisesimweni esibucayi.
Isibhamu okusolakala ukuthi sasetshenziswa asikatholakalali, okhulumela amaphoyisa esifundazweni saseGauteng uColonel Dimakatso Nevhuhulwi ukuqinisekisile ukuthi kutholwe igobolondo endaweni yesigameko. Kodwa-ke, naphezu kophenyo olwenziwa amaphoyisa e-K9 kanye namathimba ahlola amacala, isibhamu okusolwa ukuthi sisetshenziswe kulesi sigameko asikatholakali.
Icala lihlehliselwe uMashi 3, lapho abammangalelwa bazofaka khona isicelo sebheyili bobabili abasolwa bagcinwe esitokisini.