ICosatu ikhala ngengozi engase yehlele abasebenzi basePosini

UMFELANDAWONYE wezinyunyana zabasebenzi, iCosatu, ukhala ngemali eyathenjiswa wuMnyango kaMgcinimafa, engakafinyeleli kubasebenzi basePosini.

Lo mfelandawonye usufune umhlangano nongqongqoshe abehlukene okubalwa owoMnyango wezokuXhumana nobuChwepheshe, uMgcinimafa kanjalo noweziSebenzi.

UMnuz Matthew Parks weCosatu uthe bafuna ukuhlangana nongqongqoshe bale minyango, ukuze kutholakale isixazululo esisheshayo ngezinkinga zabasebenzi basePosini.

Uthe uMgcinimafa wayethembise ukufaka u-R3.8 billion ePosini kodwa kuze kube yimanje le mali ayifikile.

"Sithole ukuthi abasebenzi basakhokhelwe izikhawu ezintathu kuphela, imali ye-Unemployment Insurance Fund’s Temporary Employee Relief Scheme (UIF’s TERS). Kwakumele ikhokhwe izikhawu eziyisithupha kodwa kusakhokhwe ezintathu." 

Uthe kuyabakhathaza nokuthi nobhekele ukutakula iPosi usecabanga nokuya enkantolo afune ukuthi livalwe thaqa.

"Uma kwenzeka lokhu kuyoba yinhlekelele kubasebenzi nemindeni yabo. Amakhasimende nemiphakathi ethembele ePosini izothwala kanzima," usho kanje.

Uthe iyofana neze leze imizamo yePhalamende neNedlac yokuchibiyela umthetho olawula iPosi nePostbank ukuze lesi sikhungo sikwazi ukusebenza ngendlela efanele.

"Siyahambisana nemibono yabasebenzi kanjalo nekahulumeni yokuthi obhekele ukutakula iPosi, ugxile ekudilizeni abasebenzi, wavala namagatsha ePosi, okunqinde imizamo yokuthi lesi sikhungo sivuke emaqandeni. Kubalulekile ukuthi uhulumeni ayisukumele ngokushesha le nselelo ezolimaza inqwaba yabantu abathembele kulesi sikhungo."