Bane abathelwe othulini amaphoyisa eNanda
INDAWO yesigameko okuqothwe kuyo abasolwa abane
Image: SAPS
BATHELWE othulini amaphoyisa eMatikwe, eNanda ngoLwesibili, abasolwa abane ebebefunelwa amacala abucayi.
Ngokusho kokhulumela amaphoyisa KwaZulu-Natal, uColonel Robert Netshiunda, abasolwa bebefunelwa amacala ehlukene okukhona kuwo awokubulala, awokuzama ukubulala, nokubamba inkunzi behlomile.
Uthe badutshulwe, babulawa amaphoyisa e-Area 2 eMatikwe kulandela ukuthi begadle kuqala emaphoyiseni.
“Amaphoyisa alandele umkhondo ngabasolwa abaziwayo, ababonwe emjondolo onamagumbi amabili ebebebhace kuwo eMatikwe,” kusho uNetshiunda.
Uthe badutshulwa nje, abakwaSidlodlo kuthe uma bememezela ukuthi sebefikile, bavele bavulela ngenhlamvu.
“Lokhu kuholele ekutheni kufe abasolwa abane. Kutholwe izibhamu ezine nenqwaba yezinhlamvu,” kusho uNetshiunda.
Uthe alikho iphoyisa elilimele esigamekweni.
Ezinkundleni zokuxhumana kusabalale imibiko ethi abasolwa bebesanda kubamba inkunzi uKimu Mngomezulu, odume ezinkundleni zokuxhumana.