Bakhala ngamaphoyisa ahlulwa yimilutha yewunga aphendukele kubo
UMDAYISI uRasta Jija ungomunye wabanamatafula abahlushwa amaphoyisa eThekwini emthathela izimpahla zakhe ebasola ngokungabi nazimvume okanye okudayisela izindaweni abangagunyaziwe ukuba kuzo
Image: SIBONELO NGCOBO
BAKHALA ngamaphoyisa kaMasipala weTheku, akhishwa inkani yimilutha yewunga, bese ezokhiphela kubo isibhongo, abadayisa emigwaqweni esenkabeni yedolobha nakwezinye izindawo.
Basho lokhu kulandela ukuthi amaphoyisa etshele iphepha elinguzakwabo weSolezwe, iDaily News ngeledlule ukuthi impi yemilutha yewunga isiwehlule. Okhulumela amaphoyisa kaMasipala weTheku, uColonel Boysie Zungu, utshele iDaily News ukuthi banenkinga yokuthi imilutha iyabuya njalo uma kade beyixoshile. Uthe ukungabi bikho kwezikhungo zokugcina abangenamakhaya, yikhona okuyinkinga.
Le milutha sekuphele izinyanga eziyisihlanu ingenise emgwaqweni uChe Guevera, owawaziwa ngoMoore Road. Imilutha ivale umzila owodwa walo mgwaqo ngamatende okuzakhela. Ihlala kuwona ubusuku nemini, ilokhu izulazula kule ndawo. Ngeledlule kusabalale i-video ikhombisa imilutha ibamba inkunzi imoto ebidlula kulo mgwaqo.
Omunye wabadayisi, uNksz Thabo Ngcobo wenhlangano yabadayisa iphinifa eThekwini, iPhinifa neDuku Association, uthe emgwaqweni uVictoria enkabeni yeTheku, ukugasela kwamaphoyisa, yisinkwa semihla ngemihla.
“Thina sihlala nawo amaphoyisa kuVictoria. Afika nsuku zonke ezosiphuca impahla yethu. Noma ungaguqa ngamadolo, uzincengele, awezwa mshini,” kusho uNksz Ngcobo.
Uthe ayayithatha impahla bese ebanika amathikithi enhlawulo ka-R600. Uthe uma umuntu efuna ukuthi impahla yakhe ibuye, kusuke kufanele avuke ngakusasa ayokhokha lo R600.
“Sizwa ubuhlungu uma amaphoyisa evuma ukuthi iyawahlula impi yamaphara ngoba le ayibhekise kithi, ayiwahluli,” kusho uNksz Ngcobo.
Uthe ngabe bayajabula ukuba amaphoyisa kamasipala ahlale ebahlukumeza ngokubathathela impahla, asebenzisa umfutho ofanayo ukuyojaha imilutha yewunga.
Uthe nakuba bazi ukuthi kuthiwa baphula umthetho kodwa bondla imindeni ngemali yokudayisa emgwaqweni.
“Imilutha yewunga yona ihlukumeza abantu, ibabambe nenkunzi. Yibona bantu okufanele engabe banomdlandla wokulwa nabo, hhayi thina,” usho kanje.
Ekhuluma neSolezwe uZungu izolo uthe bengamaphoyisa baqinisekisa ukugcinwa kwayo yonke imithetho kamasipala.
Uthe abadayisa emgwaqweni bazi kahle ukuthi kudingeka ukuthi babe nezimvume zokudayisa ukuze baqhube amabhizinisi ezitaladini zeTheku.
“Asilwi nabo, siqinisekisa ukugcinwa kwemithetho kamasipala,” kusho uZungu.
Ube eseveza ukuthi neyabahlala emgwaqweni bayayilwa cishe nsuku zonke.
“Sisemkhankasweni wokukhuculula iTheku futhi siyanqoba,” usho kanje.
“Akulona iqiniso ukuthi asilwi nabahlala emgwaqweni,” kusho uZungu.