Izitshudeni zibhikishele 'ubhuti omdala weDelangokubona'
IZITSHUDENI zaseCoastal KZN TVET College kwa-V, eMlaza zibhikishela eyokufunzwa izindawo zokuhlala izitshudeni ezingazifuni
Image: TUMI PAKKIES/Independent Newspapers
ZITHUKUTHELE maqede zabhikisha izolo ngaphandle kwesikhungo semfundo ephakeme, iCoastal KZN TVET College, kwa-V, eMlaza, izitshudeni ezinqaba ukuhlaliswa ezindaweni ezingazifuni.
Ngokusho kwesinye sezitshudeni ebezibhikisha, esicele ukungadalulwa ngenxa yokubona singaphephile, abazifuni izindawo ezihlala ezitshudeni abaphoqelelwa ukuthi bazisebenzise.
Siveze izinsolo zokuthi lezi zindawo ziselokishini eMlaza, kanti ezelungu elaziwayo, abaligagule ngegama lenhlangano, iDelangokubona.
IDelangokubona ayitholakalanga ukuba iphawule ngokuyamaniswa kwalo somabhizinisi nayo.
IZITSHUDENI zaseCoastal KZN TVET College kwa-V, eMlaza zibhikishela eyokufunzwa izindawo zokuhlala izitshudeni ezingazifuni
Image: TUMI PAKKIES/Independent Newspapers
“Esontweni elandulela eledlule, lo baba utheleke emagcekeni esikhungo ehlome ngesibhamu. Ufike wakhomba ngesibhamu isisebenzi sesikhungo esijutshwe ukuthi sibhekelele ukuhlaliswa kwezitshudeni. Usitshele ukuthi asiqinisekise ukuthi izitshudeni zihlaliswa ezindaweni zakhe, hhayi kwezinye izindawo,” kusho isitshudeni.
Siveze ukuthi azikho izinyathelo ezithathwe abaphathi besikhungo ezifana nokuvulela owesilisa icala.
“Kuyicala ukukhiphela umuntu isibhamu, umkhombe ngaso. Sifuna ukwazi ukuthi isikhungo sihlaleleni singamvulele lo baba icala,” kusho isitshudeni.
Siqhube sathi, esikhundleni sokuthi isikhungo sivulele owesilisa icala, sitshele izitshudeni ukuthi ngoba usekhulumile “ubhuti omdala”, kufanele kwenzeke lokhu akufunayo.
Kuze kwashaya isikhathi sokushicilela isikhungo singakaphefumuli ngezinsolo ezibekwayo.
“Asizifuni izindawo zokuhlala zalo muntu siyizitshudeni. Inqwaba yabebehlala kuzo ibe noxhaxha lwenkinga ngonyaka odlule. Bekuphela amanzi, ugesi, i-Wi-fi, kuthi uma umnikazi ebikelwa, azikhiphele isibhamu izitshudeni,” kusho isitshudeni.
Sithe abafuni ukuhlala ezindaweni zomuntu abamsabayo, okuthi uma kuvela izinkinga, esikhundleni sokuthi azilungise, akhethe ukubajijimeza ngesibhamu.
Ziphinde zakhala ngezokuphepha ezindaweni zakhe, zathi akukho ngisho onogada, nokwenza zizizwe zingaphephile.
“Lezi zindawo esifuna ukuyohlala kuzo thina, ezisenkabeni yeTheku, zinonogada, ubusuku nemini. Sizizwa siphephile uma sihleli kuzo,” sisho kanje.
Siphinde sathi izitshudeni zinelungelo lokuyohlala noma kuphi lapho ezifisa ukuhlala khona, ngaphandle kokusatshiswa nokuphoqwa ukuthi ziyohlala endaweni ezingayifuni.
Sithe bazoqhubeka nombhikisho wabo, kuze kulalelwe izikhalo zabo. Sithe bayazi ukuthi owesilisa uthumela abathile ukuthi baqalaze ngisho nasemaqoqweni kaWhatsApp lapho bekhuluma khona ukuze azi amagama alabo abaphikisa eyokuthi izitshudeni zihlale ezindaweni zakhe.
Usomabhizinisi wezindawo okuthiwa uyathinteka uzanywe kaningi ocingweni okuthiwe ngolwakhe, lwangaphendulwa.