I-DUT igabe ngezitshudeni eziyisithupha kowamabhizinisi eThailand
OSIYETHEMBA Ngema we-Isithenjwa Holdings no-Olwethu Mncwabe weReigh Technology, abayingxenye yezitshudeni zaseDurban University of Technology, ezimele le nyuvesi embuthanweni wezamabhizinisi ozoba seBangkok, eThailand
Image: SITHUNYELWE
NJENGOBA esephelile amaholidi okuphela konyaka, seluqale phansi ushikishi lokufukulana ngezamabhizinisi eDurban University of Technology, ngohlelo lwayo lokuthuthukisa kufukulwe izitshudeni ezinothando nentshisekelo yezamabhizinisi i-Innobiz DUT.
Lokho kuqale ngokuthi le nyuvesi ithumele izitshudeni zayo eziyisithupha ziyoyimela embuthanweni wokucobelana ngezamabhizinisi ozoba amasonto amabili eSuranaree University of Technology, edolobheni iBangkok, eThailand.
Lezo zitshudeni oMpilwenhle Malinga weThink Waste Africa, Phindi Thokozani Buthelezi weMyco-Feeds, Mpumelelo Gwala weCreative Wrap SA, Olwethu Mncwabe weReigh Technology, Ndumiso Mngomezulu weLubelo Tech Solutions noSiyethemba Lusanda Ngema we-Isithenjwa Holdings PTY LTD.
Kulolu hlelo lwezamabhizinisi olubizwa nge-SUT Global Entrepreneurship Camp kusuke kubuthene inqwaba yosomabhizinisi abasafufusa abayizitshudeni zasemazweni omhlaba awu-10, ngenhloso yokucobelana ngolwazi lokuthuthukisa amabhizinisi.
Indikimba yanonyaka ithi Sustainable and Resillient Communities: Innovating for a Healthier Plannet and People, uqale ngoMgqibelo uze uphethwe ngoMsombuluko wangoFebhuwari 9.
Izitshudeni ezizobe zikulolu hlelo zizoba nenhlanhla yokuhlonyiswa ngolwazi lokuthi amabhizinisi azo ziwamaketha kanjani, ukuthi zenzani uma zifuna ukufaka izicelo zokuxhaswa kuwona, amasu nezindella zokubhekana nezinselelo zebhizinisi, nokuthi yimaphi amathuba okumele ziwabambe ngezandla zombili ukuze zizithuthukise.
Imenenja ye-Innobiz DUT Centre, uNksz Nontokozo Ngcobo, ithe kuyabajabulisa ukuthi balokhu beqhubeka nokusiza izitshudeni zabo ezinothando lwezamabhizinisi ukuthi zifukuleke futhi zithuthuke. Uthe eminyakeni edlule sebesize izitshudeni ezingaphezu kuka-500 ngamathuba afuze leli emazweni okubalwa kuwo iFinland, Australia, China neRussia.
“Sibheke ukuthi konke kuhambe kahle, futhi sithemba ukuthi izitshudeni zethu zizoqikelela ukucosha lonke ulwazi oluzozisiza uma sezibuyile ekhaya zizoqhubeka nezifundo zamabhizinisi, bese zenza nomehluko obonakalayo emphakathini,” kusho uNksz Ngcobo.