Bavelile onogada bemeya abasolwa ngokubulala isosha
BAZOBUYELA ngoLwesine, eNkantolo yeMantshi ePitoli, sebefaka isicelo sebheyili onogada ababili bemeya yaseMadibeng ababhekene nelokubulala isosha
Image: x
ONOGADA ababili abayingxenye yethimba eliqapha iMeya kaMasipala waseMadibeng, uThabang Eugene Sohole (41) noMichael Makampe (42), bavele kafushane ngaphambi kweNkantolo yeMantshi yasePitoli, namuhla. Babhekene necala lokubulala nokwephula umthetho.
Kusolwa ukuthi ngomhla ka-28 Januwari 2026 ngabo-8 ebusuku, umufi nomkakhe, abangamalungu eSouth African National Defence Force (SANDF), bebehamba ngo-Eskia Mphahlele Drive bebheke ku-R80, ngesikhathi behlatshwa amalambu eBMW SUV emnyama efakwe amalambu aluhlaza. Laba abashadene babe sebejikela ku-R80 obheke eMabopane, nokuyilapho kuthiwa baphoqwe ukuba bame eceleni komgwaqo.
Kusolwa ukuthi uSohole noMakampe baphume emotweni yohlobo lwe-BMW, omunye wabo ehlome ngesibhamu i-R5, basondela emotweni yalezi zithandani. Umufi ubehleli esihlalweni somgibeli, umkakhe kunguye umshayeli. Laba bobabili kuthiwa babuze lezi zithandani ukuthi ziphi izinombolo yangemuva yemoto yabo?
Umyeni uphume emotweni wabalandela eyobheka ukuthi bangobani nokuthi banalo yini igunya lokuvimba abantu emgwaqweni. Ngesikhathi esondela ku-BMW, kuthiwa udutshulwe ekhanda washonela khona lapho.
Emuva kwamahora ambalwa, abasolwa ababili bazinikele esiteshini samaphoyisa eHercules, bethi bayizisulu zokuzama ukuduna imoto nokuthi kwenzeke isigameko sokudubula ku-R80.
Icala lihlehliselwe umhlaka-4 kuFebhuwari 2026, ukuze bafake isicelo sebheyili ngokusemthethweni.