Ubanjwe 'engena isinyenyela' ehhovisi lakhe uSenona okhishwe onogada
Inhloko yoKlebe eKZN uMaj-Gen. Lesetja Senona,
Image: Oupa Mokoena / Independent Newspapers
Kuthiwa wenze okungajwayelekile efika ngoMgqibelo emsebenzini u-Major General Lesetja Senona waziqhatha nonogada. Yize enendawo yokupaka abekelwe yona esezingeni labaphathi kwelomkhulu wamaphoyisa esifundazweni saKwaZulu-Natal, ngoMgqibelo, mhla ka-31 kuJanuwari 2026, uMajor General Senona ufike wapaka emgwaqweni maqondana bebhilidi lasemaphoyiseni, hhayi endaweni yakhe yokupaka. Ngemuva kwemizuzwana wabe esejoyinwa omunye uColonel wophiko loKlebe KwaZulu-Natal. UColonel ushiye imoto yakhe wajoyina uMajor General Senona emotweni yakhe cishe imizuzu engu-45.
Ngemuva kwalokho uMaj General Senona ungene ebhilidini nonobhala wakhe. Ngesikhathi engena ebhilidini, uMajor General Senona wephule umthetho wezokuphepha ngokuya ehhovisi lakhe ngaphandle kokusayina irejista. Unobhala wakhe uzisayinele yena yedwa. UColonel, naye ungene wangabhalisa nokuyinto edide onogada abaqaphe amakhamera.
Babikele uKhomishana wesiFundazwe saKwaZulu-Natal, uLieutenant General Nhlanhla Mkhwanazi ngezinto ezingajwayelekile abazibonile. Okunguyena okhuphe umyalelo wokuthi abamkhiphe ebhilodini.
Ngesikhathi ekhishwa, kuthiwa uSenona uzame ukuqubula ikhompyutha namapheshana omsebenzi kodwa wavinjwa.
"Sithe uma silandela ubufakazi bakhe abenze kwikhomishana kaMadlanga lapho aveze ukuthi kunemiqulu yomsebenzi ayinikeza umuntu wangaphamdle, sibone kubalulekile ukuqinisa ezokuphepha ukugwema isimo esifana naleso," Kusho uColonel Robert Netshiunda okhulumela amaphoyisa eKZN.
Kuthiwa esehamba, uMaj General Senona unqume ukushiya izikhiye zehhovisi lakhe.
"Konke okwenzekile, uLt General Nhlanhla Mkhwanazi ukubikele ibamba lenhloko yoKlebe wanxusa ukuba kuthunyelwe umuntu ozobuyisela kuMaj General Senona izikhiye zakhe."