OwezeMpilo wehlisa amaphaphu ngokushoda kwama-ARV

UMNYANGO wezeMpilo usuwehlise amaphaphu abantu bakuleli abadla imishanguzo yokuthithibalisa i-HIV, ama-ARV, ukuthi bazoqhubeka bayithole ngaphandle kokuphazamiseka.

Okhulumela owezeMpilo, uMnuz Foster Mohale, uthe ngeke kube nokuphaziseka kokusatshalaliswa kwale mishanguzo kuleli ngenxa yokuthi izinkampani ezenza lo msebenzi zibhekene nezingqinamba zokuthi zingase zivalwe.

Uthe ikhona le mishanguzo ngakho ngeke kwenzeke kube nokuphazamiseka.

"Umsebenzi wokusabalalisa ama-ARV wanikwa izinkampani ezehlukene ukuze iqhubeke nokusatshalaliswa ngaphandle kokuphazamiseka. Siyazi izinkampani ezimbili ezathola lo msebenzi zinezinselelo ngakho zingase zivalwe. Yingakho sihlale sinayo imishanguzo enqolobaneni ngakho ngeke sibe nenkinga yokuthi iphele," usho kanje. 

Uthe sebekhulume nezinye izinkampani abasebenzisana nazo ukuthi zinyuse isibalo semishanguzo eziyihambisayo ukuze kuvaleke isikhala esidalwe yilezi zinkampani ezibhekene nenkinga.

"Sinemishanguzo ezokhava izinyanga eziyisithupha kanti siyaqhubeka nokuqapha ngelokhozi ukuhanjiswa kwayo. Lokhu sikwenza ngoba singafuni kube nokubambezeleka." 

Uthe bayazi umthelela ongabakhona uma ngase baphelelwe yile mishanguzo.

"Abadla imishanguzo abaqhubeke bayilande njengokujwayelekile ezikhungweni zabo. Kuseqhulwini eMnyangweni ukuthi kungabi nokuphazamiseka ekuhanjisweni kwayo." 

Bangaphezu kuka-6 million abantu bakuleli abadla ama-ARV, kubantu ababalelwa ku-8 million abahaqwe yileli gciwane.

I-DA ifuna uNgqongqoshe wezeMpilo, uDkt Aaron Motsoaledi, avele ngaphambi kwePhalamende azochazela isizwe ngale nkinga.

Ithe ifuna kwazeke ukuthi bayilungisa kanjani njengoba lezi zinkampani zisenkingeni yezezimali okungenza kuphazamise ukuhanjiswa kwale mishanguzo kubantu abayidlayo.

Kwenzeka lokhu nje, uMnyango usemkhankasweni wokufuna abantu abalaxaza le mishanguzo ngezizathu ezehlukene kuleli. Uhambela izindawo ezehlukene okubalwa nalapho kuhlanganyela khona abesilisa, okuyibona abanesibalo esiphezulu sabantu abayeka imishanguzo ukuze babuyiselwe ohlelweni lokuthi bayidle futhi.