UVictor Majola uzogqunywa esitokisini

UVictor Mthethwa Majola, osolwa ngokuhlela ukubulawa kukaWarrick “DJ Warras” Stock, unqatshelwe ibheyili yiNkantolo yeMantshi eGoli.

UMajola, 44, ubhekene namacala okubulala, ukubulala ehlosile kanye nelokwakha itulo lokubulala kulandela ukudutshulwa kuka-DJ odumile, umsakazi nosomabhizinisi ngaphandle kwefulethi iZambesi Building enkabeni yedolobha laseGoli ngoDisemba nyakenye.

U-DJ Warras, naye owayengumsunguli wenkampani yokuvikela i-VIP, udutshulwe izikhathi eziningi uMbuso uthi bekuhleliwe. Ukubulawa kwakhe kudale ukushaqeka okusabalele embonini yezokuzijabulisa kanye naphakathi kwabalandeli bakhe.

Ngesikhathi kuqhubeka isicelo sebheyili, uMajola utshele inkantolo ukuthi kumele adedelwe njengoba kusaqhubeka ukuphenywa kwecala, egcizelela ukuthi akayona ingozi yokubaleka futhi akanasizathu sokubalekela ubulungisa. Uveze ukuthi ungumnikazi wamatekisi ozisebenzayo onempahla, nobudlelwane obuqinile nomphakathi, futhi uyakuphika ukuthi uyathinteka kuleli cala.

UMajola uqhube wathi icala abhekene nalo lintekenteke futhi lisekelwe ekuqagelenii. Uphinde wazama ukuphoqa uMbuso ukuthi ulethe ama-video akholelwa ukuthi angasiza ecaleni lakhe.

Ngesikhathi umbuso uphikisa ibheyili, uthi uMajola ubeka engcupheni ezobulungiswa futhi angaphazamisa ofakazi uma ededelwa. Abashushisi batshele inkantolo ukuthi kunobufakazi obumhlanganisa nokuhlelwa kwetulo lokubulala, okuhlanganisa nezithombe zeCCTV nezitatimende zofakazi ezimbeka eduze kwendawo yesigameko ngosuku lowesehlo.