UGodongwana ucela ukuphawula kwabantu ngabakulindele kwisabelomali
Enoch Godongwana
Image: World Economic Forum
KUCELWA abanombono wokuthi yikuphi abafuna kube yingxenye yesabelomali salo nyaka, esizothulwa nguNgqongqoshe wezeziMali uMnuz Enoch Godongwana, ukuthi balethe le mibono.
Isabelomali sizothulwa ePhalamende ngoFebhuwari 25, 2026.
UMnyango kaMgcinimafa uthe bafuna imibono yomphakathi ngezinto ezehlukene abafuna ukuzibona ziyingxenye yesabelomali.
Uthe inhloso wukuthi athole izinto ezifunwa abantu bakuleli ukuze kuphuculwe impilo yabo.
"UGodongwana uzokwethula umbiko ngezinto izwe elizozenza, libhekele nezinye izinhlelo ezithinta umphakathi. Abantu bangaletha imibono yabo ngezinto ezithinta isikweletu esiphezulu sikahulumeni, ukuxhasa izinhlelo ezifana nezemfundo nezempilo, ukuhlinzekwa ngamanzi, imigomo ethinta intela, ukuxhaswa komasipala nokunye."
Ezintweni okulindeleke ukuthi uGodongwana akhulume ngazo, wuchatha othinta izibonelelo ezikhokhwa wuhulumeni, ukuxhasa ezemfundo nezempilo ezibhekene nengcindezi kwisabelomali, intela ethinta izinto ezehlukene okubalwa nendaba yokunyusa imali ekhokhwa amaxhwele nokunye.
Abaphawulayo bayalelwe ukuthi balethe imibono yabo ungakashayi uFebhuwari 16, 2026.
Bangaphawula ngokuya ezinkundleni zokuxhumana babhale ukuthi: #TipsForMinFin and #Budget2026:X – Treasury_RSALinkedIn – National Treasury RSATik Tok – @TreasuryRSAFacebook.
Kwenzeka lokhu nje uMengameli Cyril Ramaphosa uzoba nomhlangano wokuhlala kweziNdlu ezimbili zePhalamende, okuyiNational Assembly neNdlu yoMkhandlu weziFundazwe iNCOP, ukuze athule inkulumo ebhekiswe esizweni, i-2026 State of the Nation Address (SONA).
Le nkulumo uzoyethula ngoFebhuwari 12, 2026 eKapa.
Ubize ukuhlala kwePhalamende ngaphansi kwesigatshana u-84(2)(d) woMthethosisekelo.
Kulo mhlangano kulindeleke ukuthi athule izinhlelo zikahulumeni zalo nyaka, aveze nezinselelo ezibekhona.
Le nkulumo uyethula ngo-7 ebusuku. Kulo mcimbi kumenywa izicukuthwane ezehlukene okubalwa nababengomengameli kanjalo nababengoSomlomo bePhalamende. Kuba nombukiso nokuviliyela kwamasosha, izimenywa zisuke zigqoke ziconsa.