Uphase ngamalengiso owayeka u-matric wayohlala ekhaya ngoba egula

UKUFANISA nesibusiso okumehlele umfundi waseVelangaye Secondary eNkandla, uMboniseni Nkomonde (19), ophumelele ngamalengiso u-matric wakhe, ekubeni eke wagula wahlala unyaka wonke ekhaya engafundi.

UMboniseni waseNhlungwane, oLundi, uthe ngo-2024 kwadingeka ukuthi ayeke isikole emuva kwamasonto amabili eqale u-matric, ngenxa yokugula.

Uthe kwadingeka awuhlale ekhaya wonke u-2024 egula waze waba ngcono, wabuyela esikoleni ngo-2025.

"Angazi  ukuthi ngingathini ngoba ngaphambi kokugula, ngangiphasa nje njengabo bonke abafundi. Ngibona ukuthi ngibuyele nyakanye ku-matric umqondo wami usuthe thuthu. Ngisebenze kanzima kanti ngiyazazi ukuthi ngifunani," usho kanje.

UMboniseni ungomunye wabafundi abahlonishwe yizikhulu zoMnyango wezeMfundo KwaZulu-Natal, emcimbini ose-Inkosi Albert Luthuli Convention Centre (ICC) eThekwini, ngokwenza kahle kuleli banga.

"Abazali bami abangatohozi, yibona abanquma ukuthi ngiyofunda eNkandla ngenxa yokwenza kahle kweVelangaye. Ngisizwa abafowethu ngemali, kwabona babamba amatoho siphinde siphile ngemali yesibonelelo sikahulumeni njengoba abazali bengasebenzi. Ngibonga kakhulu kubafowethu nakubazali ngokungeseka ezifundweni zami." 

Ubenza izifundo isiZulu, English, Life Orientation, Maths, Physical Science, Life Sciences, Mechanical Technology ne-Engineering Graphics and Design (EGD).

"Ngifuna ukwenza i-Mechanical Engineering eNyuvesi yaKwaZulu-Natal. Okwamanje angikathathwa njengoba bengisalinde imiphumela yami," usho kanje.

UMboniseni ongowesine ezinganeni zakwabo, uthe uthanda ukudlala ibhola kanjalo ne-volley ball.

Esikoleni unconywa ngokwenza kahle kwi-EGD nakwi-Mechanical Technology. Uqale ukufunda eVelangaye eyokwenza uGrade 8.

"Ngihlose ukuvula inkampani yami, ngiqashe abantu ngakhe amathuba emisebenzi. Ngifuna ukusiza ekhaya uma sengisebenza ngiphinde ngibe wusizo nasemphakathini."