Babekelwe umnqamulajuqu abafuna kubuyekezwe ukuchithwa yiNSFAS

BABEKELWE umnqamulajuqu wangelizayo, ababhekene nengwadla yokuchithwa yisikhwama iNational Student Financial Aid Scheme (NSFAS) ngokuxhaswa kulo nyaka.

Bayalelwe ukuthi babe sebefake izicelo zokuthi kubuyekezwe lesi sinqumo, ngoJanuwari 14, 2026.

UDkt Mugwena Maluleke, ibamba likaSihlalo walesi sikhwama, uthe abachithwe yilesi sikhwama, abasheshe bafake izimangalo ungakashayi uJanuwari 14. 

Bacela ku-50 000 abachithwe ukuthi bathole uxhaso ngoba abazali babo behola imali engaphezu kuka-R350 000, ngonyaka.

"Livuliwe ithuba lokuthi kufakwe izimangalo kulabo abachithwe ekutholeni uxhaso. Sizokhipha isinqumo sokuthi izicelo zabo zihambe kanjani ngoFebhuwari 16, 2026," usho kanje ekhuluma nabezindaba esithangamini ebesisePitoli izolo.

Uthe kumele balethe zonke izimfanelo zabo abachithwe ekutholeni uxhaso.

Uveze ukuthi bazojuba abasebenzi abazosiza ezikhungweni zemfundo kusuka ngoJanuwari 13 kuya ekupheleni kukaMashi.

"Sizoqala sifake imali ezikhungweni ekupheleni kwale nyanga ukuze ixhase izitshudeni ngezinto ezehlukene. Asifuni kube nezitshudeni ezizoba omantunta nendishi, ezinye ezizolala endle ngoba kuthiwa imali ayifakiwe," kuqhuba uMaluleke.

Uveze nokuthi abangu-520 000 abaxhasiwe abahola imali yesibonelelo sakwaSASSA.

"Babalelwa ku-25 000 abaphila nokukhubazeka abaxhasiwe. Isibalo esikhulu sabaxhasiwe abesifazane, okusho khona ukuthi yibona abaningi emfundweni ephakeme. Abaningi abaxhasiwe yintsha eneminyaka engu-20. Abanye abaneminyaka engu-30." usho kanje.

UMaluleke udalule nokuthi kunabangu-621 abaneminyaka engu-50 kuya phezulu abaxhasiwe kulo nyaka.

UMnuz Waseem Carrim, isikhulu esiphezulu seNSFAS, uthe kunokukhuluma okuningi okukhona okuthinta nendaba yokuthi sikhona yini isidingo salesi sikhwama njengoba umsebenzi esasungulelwa wona sewenziwa ngezinye izinkampani ezizimele.

Uthe okunye ukukhuluma kuveza ukuthi kumele amanyuvesi aziphathele imali ukuze kube yiwo axhasa ngqo izitshudeni.

"Kuzokhumbuleka ukuthi kwawona amanyuvesi awamsulwa ekuphathweni kwemali. Amanye abuyisela izigidi kwiNSFAS ngakho ngibona lesi sikhwama sisabaluleke kakhulu emsebenzini wokuxhasa izitshudeni," usho kanje.

Usho lokhu nje uNgqongqoshe wezeziMali uMnuz Enoch Godongwana, wathi ngeke ananaze ukuvala lesi sikhwama uma enikwa imvume.

Wakhala ngokuthi asisawenzi umsebenzi esasungulelwa wona ngoba sesiwudlulisele ezinkampanini ezizimele. Waveza nokuthi isikhulu esiphezulu salesi sikhwama sihola ngaphezulu kukamengameli wezwe.

UCarrim uthe abafuni zihlupheke kakhulu izitshudeni ezixhaswa yilesi sikhwama ngendawo yokuhlala.

Kuhlale kuba nezikhalo njalo uma kuqala unyaka izitshudeni zilale endle ngoba zisuke zingakhokhelwe yiNSFAS. Omastende bagcina sebezijikijela emnyango befuna ukukhokhelwa.