Unconywe ngamagalelo owayeyiphini likangqongqoshe wezokuThutha

UNCONYWE ngendlela abezinikela ngayo enhlanganweni i-ANC nakuhulumeni owayeyiphini likangqongqoshe eMnyangweni wezokuThutha, uNksz Dikeledi Magadzi, okuvele izindaba zokudlula kwakhe emhlabeni izolo.

Lezi zindaba zivezwe yi-ANC, ethe ushone izolo ekuseni. 

Okhulumela le nhlangano, uNksz Mahlengi Bhengu, uthe badumele ngokudlula emhlabeni kukaNksz Magadzi, owayengumholi ozinikelayo entweni ayeyenza.

Uthe wabamba izikhundla ezehlukene kuhulumeni okubalwa nokuba ilungu lesigungu esiphezulu se-ANC.

"Ubezithobile, ezinikela kuyona yonke into abeyenza, kumbe kuhulumeni noma enhlanganweni. Ubenamava kwezokuhola njengoba ake waba nguMphathiswa wezemiSebenzi yoMphakathi, ezoLimo, ezeMpilo nokuphepha eLimpopo," usho kanje.

Ezingeni likazwelonke, uthe waba ngusihlalo wekomiti lezokuThutha ePhalamende.

"Uke waba nayiphini likangqongqoshe eMnyangweni wezokuThutha, naseMnyangweni wezaManzi nokuHanjiswa kweNdle."
Uveze ukuthi uke wahola uphiko lwabesifazane ngaphansi komfelandawonye iFederation of Transvaal Women, waba ngumholi kwi-United Democratic Front, Nehawu, ANC Women’s League.

"Waba yingxenye yokusungulwa kwenhlangano yabaholi bomdabu, i-Congress of Traditional Leadership of South Africa (Contralesa). Kusuka ngo-2007 kuya ku-2022, ube yilungu lesigungu esiphezulu se-ANC."

Udlulise amazwi endunduzo emndenini, izingane kanjalo nabazukuli bamufi.

"Sidlulisa namazwi endunduzo kumalungu e-ANC, kubangani bakhe kanjalo nakubona bonke abantu abathintwe ukudlula emhlabeni kukaNksz Magadzi. Sinxusa umphakathi namalungu e-ANC ukuthi aseke umndeni kaNksz Magadzi, bawubeke emthandazweni ngalesi sikhathi usemanzini." 

Uveze ukuthi bazomemezela izinhlelo zenkonzo yokumkhumbula kanjalo neyomngcwabo njengoba kumatasa namalungiselelo.