Badidiyele intshumayelo nomyalezo wethemba abecwecwe lamaZayoni
INGXENYE yamalungu ebandla lamaZayoni iBethlehem Church In Zion, elikhiphe i-albhamu yalo yesithupha esihloko sithi Kukhona Ongithintile
Image: MSENI ENTERTAINMENT
UBUHLE bokukholwa, wubumqoka bokuthemba uNkulunkulu nomyalezo wokungaphonsi ithawula empilweni - yizona zindikimba ezihamba phambili ecwecweni elisha lekwaya yebandla lamaZayoni iBethlehem Church In Zion: Ikhaya Lendumiso, eliphume ngesonto elidlule.
Lokho kushiwo wumholi wekwaya yaleli bandla uMnuz Zama Ntombela, engxoxweni ekhethekile neSolezwe malungana nale albhamu yabo yesithupha esihloko sithi Kukhona Ongithintile, okudidiyelwe izingoma eziwu-18 kuyona.
UNtombela uthe baqale ukusebenzela ekuphekeni izingoma abazifake kuyona ngabo-Agasti, base beya ukuyoqopha e-studio se-Indoni Media, esiseGoli - abakuqondanisa nempelasonto yenkonzo yabo yesivuno ebingoSepthemba, benzela ukuphelela kahle kwabebezodingeka embhobheni.
INGXENYE yamalungu ebandla lamaZayoni iBethlehem Church In Zion, elikhiphe i-albhamu yalo yesithupha esihloko sithi Kukhona Ongithintile
Image: MSENI ENTERTAINMENT
“Wumsebenzi esidlulisa ngawo umyalezo wentshumayelo yeZwi likaNkulunkulu, esikholwa wukuthi abantu bayadinga ukuwuzwa, nokubuyisa ithemba ebantwini ngoba siqonda ukuthi kuningi kakhulu ababhekana nakho empilweni okwenza baze baphose ithawula,” kusho uNtombela.
Uthe kulo msebenzi ubambisane nabhala nabo izingoma oMnuz Sabelo Lukhele ongumholi wabantu abasha, kube wumDikhoni webandla uMnuz Jabulani Nhleko, kube nacula naye ezinye izingoma uMnuz Velaphi Gumede - nabesifazane abacula phambili ezingomeni oNksz Nozipho Mdluli, uNksz Nqobile Hadebe, uNksz Nokwazi Mbuyisa noNksz Sne noThobile Mbuyazi.
“Kanti ngibheke kakhulu izingoma ezithi Samukela Okuhle - esondelene kakhulu nenhliziyo yami ngenxa yomyalezo wayo ojulile wokukhuthaza abantu ukwamukela zonke izimo nje ababhekana nazo empilweni yabo ngoba sikholelwa ekutheni konke okwenzekayo kuyintando kaThixo.
UMNUZ Zama Ntombela, ocula phambili ezingomeni eziningi ze-albhamu entsha yebandla lamaZayoni iBethlehem Church In Zion, esihloko sithi Kukhona Ongithintile
Image: MSENI ENTERTAINMENT
“Ikhona futhi enye ingoma ethi Asibambene Negazi - eveza ukuthi emhlabeni kunezimo zomoya kaSathane esibhekena nazo ezihlose ukuzamazamisa ukholo lwethu, bese kuba nenye futhi ethi Uyangazi - yona eqinisa abantu isibindi ukungaphonsi ithawula empilweni,” kulanda yena.
Uthe akufisa kakhulu wukuthi lo msebenzi abawenzayo ungabi ngowokuzidumisa kuphela, kepha kube ngowokufeza inhloso yokuqhakambisa ubuhle namandla kaNkulunkulu ebantwini.
Kuthintwa omunye wabaholi baleli bandla uMnuz Richard Mbuyazi, yena uthe kuhlale kuyinselelo ukwenza umsebenzi onjena ebandleni ikakhulu ngoba uma uhola ibandla, kudingeka ukuthi ukwazi ukubonisana namalungu alo, futhi uhlale uzoba nobuhlakani bokuxazulula izinselelo zokuphambana kwemibono ngendlela eyakhayo, nengezukubhidlisa enisuke senikwakhile.
INGAPHANDLE le-albhamu yesithupha yeBethlehem Church In Zion, esihloko sithi Kukhona Ongithintile
Image: SITHUNYELWE
“Ibandla lethu like laba nezinselelo eziningi ebezenza ukuthi singakhiphi i-albhamu iminyaka emihlanu yonke sisazama ukuzilungisa, kanti manje sesibheke ukuthi njengoba sesibuyile nje siqhubeke nendlela ebesivame ukusebenza ngayo yokujabulisa abantu ngomculo, bese futhi sinabela ezindaweni ezahlukene ezweni lonke ngomsebenzi omuhle,” kusho uMbuyazi.
I-Bethlehem ineminyaka ewu-88 ikhona, kanti okwamanje inamagatsha ayisikhombisa koMzingazi, eNseleni, yiKwaSikhemelele, eGoli, eMseleni naseMbazwana - lapho idabuka khona.
Le albhamu yelama ayisihlanu okuqala athi Sisebenzise Jehova, Ikhanda LikaJohane, Indlu Yaphakade, Xola Moya Wami nabazibula ngayo ngo-2007 ethi Mhla Lifika Ivangeli.