UMasemola ukhala ngokwanda kodlame lwezibhamu ngesikhathi samaholidi
General Fannie Masemola
Image: Itumeleng English / Independent Newspapers
UMKHUZI wamaPhoyisa, uGeneral Fannie Masemola, usezwakalise ukukhathazeka ngokwanda kodlame lwezibhamu ngesikhathi samaholidi kaKhisimusi, wathi amaphoyisa azoqinisa umkhankaso wokufuna izibhamu ezingekho emthethweni nokulwa nodlame nokubulawa kwabesifazane nezingane.
UMasemola ubekhuluma eThekwini, izolo, ngesikhathi ehambele KwaZulu-Natal ehambisana neBamba likaNgqongqoshe wamaPhoyisa, uSolwazi Firoz Cachalia. Lolu hambo luyingxenye yemizamo yokuqhakambisa ukulungela kwamaphoyisa ukulwa nokuvimbela ubugebengu ngala maholidi.
Ngaphandle kukaCachalia, uMasemola ubephelezelwa yiPhini likaKhomishana kuzwelonke uLieutenant General Tebello Mosikili noKhomishana wamaPhoyisa eKZN uLt General Nhlanhla Mkhwanazi nezinye izikhulu eziphezulu.
UMasemola uncome amaphoyisa ngokuzinikela kwawo ngesikhathi samaholidi kaKhisimusi, wathi lokhu kuzodala ukuphepha.
Uhlelo lokusebenza kwamaphoyisa ngalesi sikhathi lwethulwe ngo-Okthoba, kanti kuthiwa luthela izithelo.
Uthe zibalelwa ku-1 507 izibhamu ezingekho emthethweni ezishaqiwe, kwavalwa amashibhi namathaveni okungekho emthethweni awu-5 228, kwatholwa nezimoto ezintshontshiwe noma eziduniwe ezingu-635.
E-KZN kuphela, amaphoyisa ashaqe izibhamu ezingekho emthethweni ezingu-541 kusukela ngo-Okthoba, okubalwa kuzo izibhamu ezingu-432 ezincane nezinkulu ezingu-48.
Bangaphezu kuka-15 000 abasolwa asebeboshiwe ngamacala okubalwa nabucayi okubulala nathinta ucansi.
UMasemola uthe kuvalwe izindawo ezidayisa utshwala ezingekho emthethweni ezingu-2 989 esifundazweni, njengoba sekuboshwe isibalo esilinganayo sabantu ngokudayisa utshwala ngokungemthetho.