Zibakhalele abazame ukufumbathisa usgaxamabhande eBergville

NgoMgqibelo, amaphoyisa ase-Upper Tugela, eBergville, abophe abasolwa ababili abaneminyaka engu-36 no-39 ubudala ngokugwazisa nenkohlakalo. NgoMgqibelo ekuseni kukhona oshayele umphathi siteshi e-Upper Tugela wahlela nomhlangano naye mayelana nelungu lomndeni wabo eliboshiwe emkhankasweni owenziwe ngoLwesihlanu ebusuku.

Isihlobo okukhulunywa ngaso siboshelwe ukutholakala nesibhamu i-AK47 nezinhlamvu eziyishumi nantathu (13). Obefonile uvezele umphathi siteshi ukuthi angase akhiphe imali ukuze kukhululwe isihlobo sakhe. Umphathi siteshi uvumile ukuthi bahlangane nomuntu eDukuza Crossing. Ngenxa yesimo somhlangano, umphathi siteshi utshale amaphoyisa eduze nendawo yomhlangano ngenhloso yokubopha uma lowo oshaye ucingo emnika imali yokugwazisa.

Njengoba kwakuhleliwe, umphathi-siteshi ufikile wahlangana nomuntu omthintile, obehamba nomunye umuntu. Laba ababili banikeze umphathi wesiteshi isamba sezinkulungwane eziyishumi nambili namakhulu ayisithupha (R 12600) ngethemba lokuthi uzozama imizamo yokuthi kukhululwe isihlobo esiboshiwe. Kuthe kusenjalo kwavumbuka amaphoyisa abeqaphe isimo abopha abasolwa ababili. Babekwa amacala enkohlakalo nokugwazisa.

Kulindeleke ukuthi bavele eNkantolo yeMantshi yaseBergville ngoLwesibili, mhla ka-23 kwephezulu kanti isihlobo sabo Sona sizovela enkantolo efanayo ngoMsombuluko.