Abangaconsi phansi eZayoni nesandla esisha ecwecweni lesi-22
U-ARCHBISHOP Samuel Mkhwanazi ongumholi webandla lamaZayoni iMighty Vision, elikhiphe i-albhamu yesi-22 esihloko sithi Angeke Ababhubhise
Image: SITHUNYELWE
ELINYE lamabandla aseZayoni angaconsi phansi kwabakhonze lo mculo, iMighty Vision, selithembise isandla esisha nesimnandi kwi-albhamu yalo yesi-22 esihloko sithi Angeke Ababhubhise, eqala ukutholakala ezitolo ze-internet zomculo ngoMsombuluko kusihlwa.
Lokho kushiwo wumholi nomsunguli waleli bandla, u-Archbishop uSamuel Mkhwanazi, engxoxweni ekhethekile ngalo msebenzi waleli bandla onezingoma eziwu-10, obhekwe ngamehlo abomvu futhi asebevele sebeqalile ukuwumaketha nokubikezela ngawo.
Exoxa neSolezwe Ngempelasonto ngawo, uMkhwanazi uthe kulokhu bephuzile ukuqala ukusebenza kuleli cwecwe elisha ngenxa yokuthi abebengamalungu ebandla abevame ukusebenzisana nabo ukuculela ibandla, bashiyile ebandleni ngenxa yezizathu ezihlukene.
UMNUZ Mfundo Malema wophiko lwezokumaketha ebandleni lamaZayoni, iMighty Vision, elikhiphe i-albhamu yesi-22 esihloko sithi Angeke Ababhubhise
Image: SITHUNYELWE
“Yingakho size saqala ukupheka umsebenzi wethu omusha ngabo-Agasti, futhi kwabuye kwaba noshintsho lokuthi indawo ebesiqophela kuyona iDowntown eGoli, yavele yavalwa - okuphoqe ukuthi sishintshe ukwenza njengoba lena siyenze eKZN Music House, eThekwini.
“Nokho ngigculisekile ngokuthi sisebenze nabantu abasha abaningi futhi abangejwayele ukwenza umsebenzi onjena wokucula phambili ebandleni, engithemba nengikholwa wukuthi konke kuzohamba ngendlela efanele ngoba kuseyiso isigqi esaziwa ngaso,” kulandisa yena.
Eqhuba, uMkhwanazi uthe indikimba yalo msebenzi iqhakambisa ukuthi uma uNkulunkulu enawe, akukho lutho namuntu okungakuphazamisa noma kuvimbe indlela yakho nezinto nje ezinhle ozifisela zona empilweni yakho.
INGXENYE yamalungu ebandla lamaZayoni iMighty Vision, elikhiphe i-albhamu yesi-22 esihloko sithi Angeke Ababhubhise
Image: SITHUNYELWE
“Siqhubeka lapho esigcine khona ukuthi sisebenzise imibhalo yaseBhayibhelini ukuphilisa abantu futhi sibelaphe imiphefumulo bese sibabuyisa nethemba,” usho kanje.
UMnuz Mfundo Malema wophiko lwezokumaketha lweMighty Vision, yena ubonge kakhulu ubuholi baleli bandla ngokubanika ithuba lokuthi basebenzise ulwazi nobuchule babo ukuthi basabalalile umsebenzi webandla labo emphakathini, ababona kuthela izithelo ezinhle.
“Manje sesibheke ukuthi ibandla lethu liqhubeke lidlondlobale futhi lihambisane nesikhathi esiphila kusona kukho konke elikwenzayo, ikakhulu ngoba phambilini sike sasalela emuva kakhulu ezintweni zobuchwepheshe njengoba sesiphucuka kahle manje,” kusho uMalema.
INGAPHANDLE lekhava ye-album entsha yeMighty Vision esihloko sithi Angeke Ababhubhise
Image: SITHUNYELWE
Ngale kwaMkhwanazi, abanye abacula phambili kulo msebenzi omusha waleli bandla ngoSimphiwe Ngidi, uSiphephelo Ngcobo, uSethabile Ngonyama, uHlengiwe Bhengu, uMbali Mngadi, uSne Gumede noMapule Nene.
Le albhamu yelama awu-21 okuqala athi Ngisebenzise, Lamula Jehova, Xazulula, Bayozisola, Isimangaliso, Ngisize Nkosi, Khuluma Solomoni, Jesu Mhlengi, Lumfanele Udumo, Ingakho Simbabaza, Lo Mhlengi, Uthando LukaBaba, Ngizwa Igazi, Imihla Yomuntu, Asondle Umoya, Uyasondla, Emfuleni, Kunegama nabazibala ngayo ngo-2008 ethi Isoni.
Leli bandla linenqwaba yamagatsha koNseleni, Eshowe, Mandeni, Othukela, KwaDukuza, Verulam, Amaoti, KwaBester, Ntuzuma, Etshelimnyama, Umlazi, Umgungundlovu, eGoli, Thembisa, Vosloorus, Cartonville, Bronkhorspruit, Eswatini naseMpumalanga.