Kudutshulwe kwabulawa umnikazi wenkampani yonogada
Kudutshulwe kwabulawa umnikazi wenkampani yonogada eLimpopo
Image: Sigciniwe
Amaphoyisa athungatha abasolwa kulandela isigameko sokudutshulwa kowesilisa oneminyaka engu-43 ubudala, ongumnikazi wenkampani yonogada eyaziwayo ezinze ePolokwane.
Lesi sigameko senzeke ngoLwesibili ebusuku, cishe ngo-23:30, eMankweng Unit A, esifundeni saseCapricorn.
Amaphoyisa abizelwe kule ndawo, kwathi uma efika endaweni yesigameko, athola imoto emhlophe yohlobo lweFord Ranger enezinombolo zaseGauteng ipake phakathi nomgwaqo. Isidumbu sowesilisa sitholwe sidindilize eduze kwemoto. Umufi ubenenxeba lokudutshulwa.
Ezinye zezimpahla zikamufi zitholwe ngaphakathi emotweni, okubalwa amaselula ne-laptop.
Kuphenywa icala lokubulala esiteshini eMankweng kanti selidluliselwe ophikweni lweProvincial Murder and Robbery ukuze kuqhutshekwe nophenyo.
Imbangela yokubulawa kwakhe ayikaziwa okwamanje, kanti akukaboshwa muntu okwamanje.