Abasafufusa batuswe ukusondela kuhulumeni ukuchumisa amabhizinisi
INGXENYE yezithameli nosomabhizinisi abebehambele umbuthano wosomabhizinisi abasafufusa iSithandokuhle Business Seminar, obuKwaDabeka Baptist Church, eClermont, eThekwini ngoLwesibili
Image: SIMANGALISO NTSHANGASE
“OSOMABHIZINISI abaningi abasafufusa bagida ndawonye ngenxa yokuthi abakhuthali ukusondela kuhulumeni, futhi abanye abazi nhlobo ngezinhlelo ezahlukene zosizo lokuchumisa nokufukula amabhizinisi emikhakha eyahlukene abagxile kuwona.”
Usho njalo uNkk Zodwa Zikalala, imenenja yophiko lwezokumaketha lweRichards Bay Industrial Development Zone (RBIDZ), ethula inkulumo yosuku embuthanweni wosomabhizinisi abasafufusa iSithandokuhle Business Seminar, obuKwaDabeka Baptist Church, eClermont, eThekwini ngoLwesibili.
Kulo mcimbi, obuyingxenye yokugubha iminyaka eyisikhombisa yenkampani yezokuhlanza iSithandokuhle Holdings, bekuhlangene osomabhizinisi bemikhakha eyahlukene ikakhulu labo abasafufusa ngenhloso yokucobelana ngamasu angabasiza ukuchumisa amabhizinisi abo.
UNKK Sithabile Mncwabe weSithandokuhle Holdings noNkk Zodwa Zikalala weRichards Bay Industrial Development Zone, besembuthaneni wosomabhizinisi iSithandokuhle Business Senmiar, obuKwaDabeka Baptist Church, eClermont, eThekwini ngoLwesibili
Image: SIMANGALISO NTSHANGASE
UNkk Zikalala uthe ziningi izinhlelo abanazo nabahlose ngazo ukufukula nokusiza osomabhizinisi baKwaZulu-Natal, kodwa ezinye zazo ezigcina zingasizanga muntu ngenxa yokuthi osomabhizinisi abaningi abasafufusa abakhuthali ukusondela kubona.
“Sinezinhlelo eziningi zokusiza osomabhizinisi abasafufusa ukungenisa emikhakheni ehlukene ikakhulu leyo eyamene nezimboni nezomhlaba, njengoba kokunye esiyaye sikwenze - kukhona nezinhlelo zokuqashisa nokuxhasa ngomhlaba ngenhloso yokuthi osomabhizinisi bangasaleli emuva futhi kungabi nzima ukuchumisa imisebenzi yabo.
“Kepha sigcina siba nenkinga yokuthi kuthi nakuba sizivulile izandla ukusiza abadinga usizo, kepha kungenzeki kanjalo ngenxa yokuthi osomabhizinisi abaningi abasafufusa abakhuthali ukuza kithina nakwezinye izinhlaka zikahulumeni ukusihlupha ngokubheka ukuthi yini nje esingabazisa ngayo ukuqhuba imisebenzi emihle abayenzayo,” kulanda uNkk Zikalala.
UNkk Sithabile Mncwabe, umnikazi weSithandokuhle Holdings ebihlele lo mbuthano, uthe kumjabulise kakhulu ukubona abalingani bakhe kwezamabhizinisi bephume ngobuningi babo ukuzothekela ulwazi oluzokwenza ukuthi amabhizinisi abo asimame.
“Lokhu ngikwenze ngoba ngikuqonda ukuthi kuningi okuvimba osomabhizinisi abasafufusa njengami, nabasengaphansi kwesigaba sami ukuthi bathuthuke, okudala ukuthi abanye babo baze basale endleleni ngoba bebona kungayeki phambili.
“Yingakho ngisebenzise lo mcimbi wokugubha iminyaka eyisikhombisa kwasungulwa inkampani yami, ukuthi sicobelelane ngowazi lokuthi abasemva kwami bangenza kanjani ukuya phambili, nokuthi nami uqobo nabanye abasesigabeni sami bangalandela miphi imigudu nemiyalelo yokungabasiza ukuthola okukhulu kunasebenakho,” kusho uNkk Mncwabe.
Ezinye izikhulumi ebezikhona woNkk Lelethu Hlongwa weFuture Harvest, Mnuz Siya Dlamini weDuzwa Africa, Mfu Siboniso Dlamuka nobephethe uhlelo uNkk Siphesihle Xhakaza.