Abaqashisa ngezimoto nomkhankaso wokujabulisa amakhasimende
IMENENJA jikelele yenkampani eyaziwa ngokuqashisa ngezimoto i-Avis, uNksz Yanela Mtati, ikhuluma esithangamini nabezindaba ebesenziwe yile nkampani emahhovisi ayo aseKing Shaka International Airport, eLa Mercy, enyakatho yeTheku ngoLwesibili
Image: SIMANGALISO NTSHANGASE
ENYE yezinkampani ezaziwa ngokuqashisa ngezimoto ezweni lonke i-Avis yethule ngokusemthethweni umkhankaso wayo wezinhlelo zamaholidi kaKhisimusi noNcibijane, onhloso yawo wukujabulisa amakhasimende nokuthi kube lula ukuqasha izimoto kuyona.
Lezi zindaba zihlaluke esithangamini nabezindaba ebesibizwe yile nkampani emahhovisi ayo asesikhumulweni sezindiza iKing Shaka International Airport, eLa Mercy, eThekwini ngoLwesibili.
Yethula inkulumo yosuku kulesi sithangami, imenenja jikelele yase-Avis, uNksz Yanela Mtati, idalule ukuthi nonyaka beze nomkhankaso abawubiza nge-4-for-3, okusho ukuthi lelo nalelo khasimende elizoqasha imoto izinsuku ezintathu, lizogixabezwa ngosuku lwesine ngaphezulu mahhala.
“Lokhu sikwenzele ukuqinisekisa ukuthi amakhasimende ethu awajabulela ngokuphelele amaholidi okuphela konyaka, nokuthi uma befuna ukujabula nokungcebeleka izinsuku ezingaphezu kwezintathu lokho bakwenze kalula nangendlela ezokwehlisa umthwalo,” usho kanje.
Eqhuba udalule nokuthi ngaphezu kwalokho sebenyuse izinga lobuchwepheshe ababubiza ngokuthi yiSafe Drive, okuzofakwa emotweni esuke iqashwe yikhasimende ngenani elithile, ngenhloso yokuthi kube lula ukuthola usizo lwezokuphepha nokunye okunjalo ngokushesha.
“Nalokho futhi kusengenye yezindlela esibheke ukuzisebenzisela ukuqinisekisa ukuthi wonke umuntu ozosebenzisana nathi kusuka manje kuya phambili uyagculiseka ngendlela esizomphatha ngayo, futhi siqikelele ukuthi amakhasimende ethu aphepha ngayo yonke indlela ngoba siyazi ukuthi njengoba kuza amaholidi, injabulo isuke inkulu nokwenza ukuthi kube khona izinto ezonakalayo ngenxa yenjabulo,” kusho uNksz Mtati.
INGXENYE yethimba labasebenzi base-Avis, esithangamini nabezindaba ebesibizwe ngabale nkampani emahhovisi ayo aseKing Shaka International Airport, eLa Mercy, enyakatho yeTheku ngoLwesibili
Image: SIMANGALISO NTSHANGASE
Uthe sebekubheke ngabomvu ukuthi basebenzisane namakhasimende abo ngendlela ezowajabulisa ngalesi sikhathi njengoba futhi benezinhlelo zokuqashisa ngemoto isonto lonke, inyanga yonke nangaphezu kwalokho - ukusiza abakhonze ukungcebeleka.
“Sinanohlelo lwe-game drive, lapho sibolekisa khona ngohlobo lwezimoto ezithile ezilungele ukuqwala izintaba nokungcebeleka ezindaweni ezinjengaseziqiwini nokunye. Kukhona futhi uhlelo lokuqashisa ngezimoto ezithile kwabaqopha imidlalo yethelevishini,” kusho yena.
Amagalelo e-Avis angengatshazwe kule mboni, okufakazelwa wukuthi isinamagatsha ayo angaphezu kuka-60 ezweni lonke, okuhlanganisa awu-16 aKwaZulu-Natal.