Akucaci ngokubuya kohlelo lwabebesiza ezikoleni

AKUCACI ukuthi lusazokhuza ibuya ngonyaka ozayo yini, uhlelo loMnyango weMfundo eyisiSekelo lwabebesiza ezikoleni zakuleli. Lolu hlelo olwaba wumbono kaMengameli Cyril Ramaphosa, beluhlanganisa iminyango ehlukene okubalwa owezabaSebenzi, okaMgcinimafa, neminye. Izinkontileka zabebesiza ziphele ngenyanga edlule kanti kuthiwa ngeke zilulwe.

Lokhu kuvezwe nguNkk Lala Maje, umqondisi walolu hlelo eMnyangweni weMfundo eyisiSekelo, ochithe ukuthi izinkontileka zizolulwa.

Uthe kungamampunge ukuthi izinkontileka zabasizi zizolulwa.

"Sazisa abasizi ukuthi bangalaleli abantu ababatshela amanga ukuthi izinkontileka zabo zizolulwa kuze kube wuDisemba. Ziphele ngenyanga edlule lezi zinkontileka kanti okwamanje akucaci ukuthi ngonyaka ozayo luzobakhona yini lolu hlelo. Asikatholi siqinisekiso esivela kuMgcinimafa ukuthi izobakhona imali yokuluxhasa uhlelo ngonyaka ozayo," usho kanje.

Lolu hlelo obekuyihlandla lesihlanu lukhona, luhlomise ngolwazi intsha eyevile ku-200 000, ecijwe ngamakhono izinyanga eziyisithupha. Luqale ngoJuni kulo nyaka.

UNgqongqoshe weMfundo eyisiSekelo, uNksz Siviwe Gwarube, uthe kuhlomule inqwaba yentsha yesifazane, ezikoleni ezevile ku-20 000 kulolu hlelo.

Uthe zinyanga zonke bekukhokhwa u-R795 million, okuyimali ebisiza kakhulu intsha ebingatohozi.

"Kusuka ngo-2020 lolu hlelo lwaqala, luhlomulise intsha ngesipiliyoni nangamathuba omsebenzi. nabafundi bazuze kakhulu ngokuba nalaba basizi abebenza imisebenzi ehlukene ezikoleni."

Abanye babasizi bebegxile ezinhlelweni zokuqinisekisa ukuthi abafundi bayakwazi ukuqonda abakufundayo.

Uveze ukuthi bamatasa nombiko oveza ukuthi lolu hlelo lube nomthelela ongakanani ezikoleni.

"Sethemba ukuthi ngomuso lo mbiko uzosiza ekutheni sazi lapho okumele siqinise khona kwezemfundo. Kanjalo nentsha ethole ithuba lokuba yingxenye yohlelo sethemba ukuthi ulwazi elutholile izokwazi ukulusebenzisa lapho iya khona."

Lolu hlelo luke lwagajwa yizinkinga ebeziphathisa izikhulu zomnyango ngekhanda. Bezihlale zikuveza ePhalamende ukuthi izinselelo ekukhokheni ngesikhathi, kuziphathisa ngekhanda.

Abanye abasizi bakhala ngokuthi abaholanga ngenxa yokuthi kwakubambezeleke ukuthi kubhekwe ama-rejista, ayeveza ukuthi bebeya emsebenzini nsuku zonke.

Intsha ebisiza kulolu hlelo iyalelwe ukuthi iye esikhwameni esinxephezela abebesebenza ukuze iyothola imali kapoyinandi, ebibanjwa zinyanga zonke.