Inzuzo ka-1.3 billion ngabazovakashela eKZN
KUSUKELA kwesokunxele wuSihlalo weBhodi leKZN Tourism and Film Authority uDkt Sibusiso Ndebele, uMphathiswa woMnyango wokuThuthukiswa koMnotho, ezokuVakasha nokoNgiwa kweMvelo uMfu Musa Zondi, uSomlomo kaMasipala waseMngeni uNksz Jonis Holmes, isekela likaMasipala waseMngeni uMnuz Sandile Mnikathi neSikhulu esiPhezulu esiBambile seKZN Tourism and Film Authority uMnuz Sibusiso Gumbi beseNelson Mandela Capture Site, eMgungundlovu ngoLwesibili
Image: SITHUNYELWE
KULINDELEKE ukuthi sifinyelele ku-1 million isibalo sezivakashi ezizovakashela KwaZulu-Natal ngamaholidi okuphela konyaka, nokuzosiza ngokungenisa inzuzo ka-R1.3 billion emnothweni wesifundazwe.
Lokho kushiwo wuMphathiswa woMnyango wokuThuthukiswa koMnotho, ukuVakasha nokoNgiwa kweMvelo eKZN, uMfu Musa Zondi, emcimbini wokwethula izinhlelo zokuvakasha obuseLa Clef Boutiqu Hotel, eMgungundlovu, ngoLwesibili.
UZondi udalule nokuthi le nzuzo bayilindele ngokuthi ukuqagela kwabo kukhomba ukuthi kubhekwe ukuthi kube nezivakashi eziwu-34 000 ezizotheleka esifundazweni ngoDisemba nje kuphela.
USIHLALO weBhodi leKZN Tourism and Film Authority uDkt Sibusiso Ndebele ethula inkulumo emcimbini wokwethula izinhlelo zokuvakasha esifundazweni obuseLa Clef Boutique Hotel, eMgungundlovu ngoLwesibili
Image: SITHUNYELWE
"Izinombolo zakulo nyaka zinhle kakhulu futhi ziyakhomba ukuthi kuzohamba kahle, okufakazelwa wukuthi kusuka ngoJanuwari kuya kuMeyi, iTheku libe nezivakashi zomhlaba ezingu-186 000, okusize ngokufaka imali engaphezu kuka-R5 billion emnothweni wesifundazwe," kusho uMfu Zondi.
Uqhube wathi bakulungele ngokugcwele ukwamukela izivakashi zasezindaweni ezahlukene ngala maholidi njengoba beqikelele nokuthi ezokuphepha ziyaqina, okwenziwe ngokuthi kube nohlelo lwabezomthetho abazonkanisa esifundazweni sonke, belekelelwa nawuhlelo lobuchwepheshe bamakhamera afakwe ezingxenyeni ezithile zesifundazwe ukuze kuphephe izivakashi.
Umcimbi wokwethula izinhlelo zokuvakasha wenzeke emva kohambo lokuvakashela endaweni eyisigcinamagugu nomlando wesizwe iNelson Mandela Capture Site eseHowick, khona eMgungundlovu. Bekuzokhonjiswa ibanga eselihanjiwe ukuthuthukisa le ndawo ukuyigcina isesimeni esifanele ukuheha izivakashi.
UMPHATHISWA woMnyango wokuThuthukiswa koMnotho, ezokuVakasha nokoNgiwa kweMvelo eKZN uMfu Musa Zondi ethula inkulumo yosuku emcimbini wokwethula izinhlelo zokuvakasha esifundazweni obuseLa Clef Boutique Hotel, eMgungundlovu ngoLwesibili
Image: SITHUNYELWE
USihlalo weBhodi yohlaka lwezokuvakasha nezamafilimu, iKZN Tourism and Film Authority, uDkt Sibusiso Ndebele uthe lokhu bakwenze ngokubambisana noMnyango wezokuVakasha ezweni ngenhloso yokuthi le ndawo iqhubeke ibe sezingeni eliphezulu. Uthe inothe ngomlando omqoka ochaza lapho izwe livela khona, okwenza ukuthi ibe yinyama kubavakashi basemazweni ehlukene emhlabeni jikelele abahlale bethutheleka kuyona.
"Lokhu sikwenziswe nawukuthi sifuna kuqhakanjiswe futhi kugqame ukuthi isifundazwe sethu sigabe ngakho konke okudingwa yizivakashi. Sifuna kuphele inkolelozo yokucabanga ukuthi sigabe ngamabhishi neziqiwu kuphela. Yingakho nalo mcimbi siwenzele endaweni yokulala ephethwe ngabantu abamnyama ukusiza ukubaqhakambisa nokubathuthukisa," usho kanje.