Akayi ndawo uRamaphosa - ANC

I-ANC isichithe ukuthi akazoliqeda ihlandla lakhe uMengameli Cyril Ramaphosa, kule nhlangano njengoba liphela ngoDisemba 2027.

Le nhlangano ithe kungamampunge ukuthi uRamaphosa ngeke aliphothule ihlandla lakhe ekuholeni uKhongolose.

"URamaphosa nethimba lesigungu esiphezulu sale nhlangano bakhethwa ngoDisemba 2022. Ihlandla lalobu buholi obuhlanganisa noRamaphosa liphela ngoDisemba 2027. Ngakho uzoliphothula ihlandla lakhe aze anikeze ozolandela izintambo engqungqutheleni yale nhlangano," kusho ibamba lomkhulumeli we-ANC, izolo, uNksz Nonceba Mhlauli, ekhuluma nabezindaba.

Ubekhuluma ngebanga ebese lihanjiwe emhlanganweni ophothulwe izolo, wesigungu obubhunga ngezinto ezehlukene eGoli. Sekube nemibiko esabalele yokuthi uRamaphosa angase angaliphothuli ihlandla lakhe kule nhlangano.

Phakathi kwezinto okubhungwe ngazo, amalungiselelo engqungquthela yamazwe omhlaba yeG20, ezohanjelwa abaholi bala mazwe ngempelasonto.

"URamaphosa uwazisile umhlangano ngamalungiselelo eG20. Uveze ukuthi konke sekumi ngomumo njengoba esexoxile nabaholi abehlukene bamazwe abazoba yingxenye yalo mhlangano," usho kanje.

Udalule ukuthi uNobhala Jikelele we-ANC, uMnuz Fikile Mbalula, uzokhuluma nabezindaba namhlanje ngokuphume emhlanganweni we-ANC. UNgqongqoshe wezobuDlelwano namaZwe oMhlaba, uMnuz Ronald Lamola, yena uthe uzokhuluma nabezindaba ngamalungiselelo eG20 khona namhlanje eNasrec, eGoli.

Uthe okunye okwenzekile ukuvotelwa kwamalungu amabili esigungu esiphezulu, azovala izikhala ezimbili ezivulekile ekomitini elibhekele ukusebenza kwansuku zonke kwe-ANC, iNWC. 

Uveze ukuthi lezi zikhala zidalwe ngukushona kukaNksz Tina Joemat-Pettersson, noNkk Peggy Nkonyeni waKwaZulu-Natal, ocele ukuhoxa ngenxa yesimo sempilo.

Kwenzeka lokhu nje, uphiko lwabesifazane lwe-ANC lufuna udlame olubhekiswe kwabesifazane luthathwe njengesihlava njengoba bebulawa njalo abesifazane.

Ekhuluma ngesikhathi kuqhubeka umhlangano wesigungu esiphezulu se-ANC izolo, uNobhala jikelele walolu phiko, uNksz Nokuthula Nqaba, uthe bafuna uhulumeni athathe lokhu kuhlukunyezwa njengesihlava ngaphambi komhlangano weG20.

Uthe bakhathazekile ngezehlakalo zokuhlukunyezwa nokubulawa kwabesifazane nsuku zonke kuleli.

"Sifuna kuqiniswe imithetho kulabo abalahlwa amacala okudlwengula abantu besifazane kanjalo nabababulalayo. Kuhamba ngelonwabu eyokulwa nalesi sihlava esibhekene nabesifazane kuleli."

Uthe bafuna umthetho uvikele izisulu zokuhlukunyezwa.

"Asifuni banikwe ibheyili ababhekene namacala okuhlukumeza. Sifuna kuqeqeshwe abezomthetho ukuze bakwazi ukubhekana namacala athinta ukuhlukunyezwa kwabesifazane nezingane. Sifuna babhekana nezigwebo ezinzima abalahlwa amacala afuze lawa," usho kanje.

Kunombhikisho omkhulu wokulwa nale nkinga ozoba ngoLwesihlanu, ngaphambi kokuqala komhlangano weG20 ohlelwe izinhlaka ezehlukene.

I-ANC Womens League iveze ukuthi kuzoba namamashi okukhalaza ngalesi sihlava esibhekiswe kwabesifazane.