I-ANCWL ifuna kuqiniswe imithetho kwabahlukumeza abesifazane
I-ANCWL ifuna kuqiniswe imithetho, kuvikelwe abesifazane kuleli njengoba kuzoba nomkhankaso ofuze lo ngaphambi komhlangano wabaholi bamazwe eG20 kuleli
Image: SITHUNYELWE
LUFUNA banganikwa ibheyili ababhekene namacala okuhlukumeza nokubulala abesifazane uphiko lwabesifazane lukaKhongolose, i-ANC Womens League.
Lolu phiko lufuna kuqiniswe imithetho ukuze kuqedwe ngesihlava esidlangile sodlame olubhekiswe kwabesifazane nezingane kuleli.
Lokhu kushiwo nguNobhala Jikelele walolu phiko, uNksz Nokuthula Nqaba, ekhuluma nabezindaba ngeSonto, ngesikhathi kuqhubeka umhlangano wesigungu esiphezulu sale nhlangano eGoli.
Uthe bafuna ukuveza ilaka labo ngokuthi kuqiniswe isandla kwabenza la macala, ikakhulu njengoba kuzoba nomhlangano wabaholi bamazwe omhlaba iG20. Umhlangano wabaholi ungempelasonto, eGoli.
"Asifuni banikwe ibheyili ababhekene namacala okuhlukumeza. Sifuna kuqeqeshwe abezomthetho ukuze bakwazi ukubhekana namacala athinta ukuhlukunyezwa kwabesifazane nezingane. Sifuna babhekana nezigwebo ezinzima abalahlwa amacala afuze lawa," usho kanje.
Uthe bakhathazekile ngezehlakalo zokuhlukunyezwa nokubulawa kwabesifazane nsuku zonke kuleli.
"Sifuna kuqiniswe imithetho kulabo abalahlwa amacala okudlwengula abantu besifazane kanjalo nabababulalayo. Kuhamba ngelonwabu eyokulwa nalesi sihlava esibhekene nabesifazane kuleli."
Uthe bafuna umthetho uvikele izisulu zokuhlukunyezwa.
Kunombhikisho omkhulu wokulwa nale nkinga ozoba ngoLwesihlanu, ngaphambi kokuqala koweG20.
I-ANC Womens League iveze ukuthi kuzoba namamashi okukhalaza ngalesi sihlava esibhekiswe kwabesifazane.