Baphithene amakhanda kuduka unina wobulewe

UPHITHENE amakhanda umndeni wakwa-H, eMlaza, kulandela ukuthola ukuthi kunyamalale nonina wowesifazane otholwe ebulewe ngesihluku ngempelasonto.

Isidumbu sikaNksz Noluthando Ntshangase (22) sitholwe sidindilize esikhotheni esingasesikoleni iZindongeni Primary, esigcemeni sakwa-M kuleli lokishi ngoMgqibelo.

Sitholwe sinqunu, izingubo zakhe ziwumfunzana eceleni, kukhona ne-tissue, nokwaqinisa izinsolo zokuthi waqale wadlwengulwa ngaphambi kokubulawa.

Kusolwa ukuthi ubulawe ngokuklinywa ngentambo yamateki njengoba ificwe imthandele ithe nsi entanyeni.

Ilungu lomndeni, uNksz Mpume Ntshangase, lithe kubaphithanise amakhanda ukungatholakali kukaNksz Sindisiwe Ntshangase (41), ongunina kamufi.

"Thina sihlala eNewlands West. ULuthando nonina bebehlala ekhaya kwa-H. Isigameko sokubulawa kwakhe besizungeza ezinkundleni zokuxhumana njengoba isithombe sakhe edindilizile besivezwa. Nathi sathintwa omunye umakhelwane wethu wakhona kwa-H ngawo uMgqibelo ethi asiphuthume endaweni yesigameko ngoba kutholakale intombazane ibulewe ebukeka ifana nesihlobo sethu," kusho uNksz Ntshangase.

Uthe banikela khona nokho bathola ukuthi isidumbu sesithathwe amaphoyisa asiyisa emakhazeni kahulumenj ePark Ryne, eScottburgh.

Uthe baze bayosibona ngoMsombuluko nokuyilapho befike baqinisekisa khona ukuthi umufi otholakele yisihlobo sabo.

Uthe kusukela lapho, bebelokhu bezitshela ukuthi bazombona unina kamufi engena ngomnyango kodwa lutho.

"Uwumuntu oke ahambe izinsukwana avakashele umuntu ahlekisana naye, kodwa abuye. Manje sithuswa wukuthi sibona sekuyophela isonto engabuyi," kusho uNksz Ntshangase.

Uthe okwenza bathuke kakhulu wukuthi izungeze kakhulu ezinkundleni zokuxhumana eyokubulawa kukaLuthando ngesihluku.

"Akukwazi ukuthi akakezwa namanje ukuthi umntwana ushonile. Kufanele ngabe usebuyile ekhaya kwazise kufanele kuqhubeke izinhlelo zomngcwabo," kusho uNksz Ntshangase.

Uqhube wathi bazamile ukumthinta enombolweni yakhe yeselula kodwa bathola kuthi ayingeni.

Uthe baphinde babheka nakowesilisa abagcina ehlekisana naye ukuthi uphi, ngeshwa ubatshele ukuthi sebahlukana.

"Sididekile siwumndeni ukuthi ngabe uphi noma wehlelwe yini ngoba akufani naye ukuthi angavele aduke kanje," kusho uNksz Ntshangase.

Uthe babikile emaphoyiseni ukuthi udukile, abhalisa umbiko womuntu odukile.

Uthe okwamanje umndeni ubungakafiki esinqumeni sokuthi uqhubeke nokungcwaba nakuba engabuyile unina kamufi.

Uthe bakhulekela ukuthi abuye ukuze kqhubeke izinhlelo zokufihla umufi naye ekhona.

Okhulumela amaphoyisa KwaZulu-Natal, uColonel Robert Netshiunda, uthe amaphoyisa aseMlaza avule icala lokubulala kulandela isigameko lapho owesifazane etholwe efile ngoNovemba 8, 2025 kuleli lokishi.

"Imbangela yokubulala ayikaziwa," kusho uNetshiunda.