Ihlinzekwe ngo-R147 million iKhomishini kaMadlanga
UNGQONGQOSHE wezeziMali, uMnuz Enoch Godongwana
Image: Armand Hough / Independent Newspapers
IHLINZEKWE ngo-R147 million, ikhomishini ephenya izinsolo zokugxambukela kosopolitiki emsebenzini wamaphoyisa kanjalo nasezinhlakeni zokushushisa kuleli.
Le khomishini eholwa yijaji eselathatha umhlalaphansi, uMbuyiseli Madlanga, yajutshwa nguMengameli Cyril Ramaphosa emva kwalezi zinsolo ezishaqisayo ezavezwa nguKhomishana wamaPhoyisa KwaZulu-Natal, uLt-Gen Nhlanhla Mkhwanazi.
Ethula isabelomali esibuyekeziwe ePhalamende ngoLwesithathu, uNgqongqoshe wezeziMali, uMnuz Enoch Godongwana, uveze ukuthi iKhomishini kaMadlanga, yabelwe u-R147 million.
UMkhwanazi wasola ukufaka unyawo lwedada kukaNgqongqoshe wamaPhoyisa omisiwe, uMnuz Senzo Mchunu, ngokuhlakaza ithimba elaliphenya ukubulawa kosopolitiki.
UMchunu usanda kugunyazwa yi-ANC ukuthi ahlabe ikhefu emsebenzini we-ANC. I-ANC iqale yanqaba ukumnika leli khefu njengoba igcine isimgunyazile.
UMkhwanazi usevelile kule khomishini eyophonswa imibuzo kanti sebevele bobabili kolunye uhlelo lwasePhalamende, kulolu daba.