Zibakhalele abasolwa ngokushisa isikole

BABHADANYWE nempahla yesikole eyebiwe abasolwa abane, abaphakathi kweminyaka engu-17 no-19, ababoshelwe icala lokugqekeza nokushisa isikole iMpolweni Secondary.

Laba basolwa babanjwe nezinto okubalwa isitembu sesikole, amaketelo kanjalo nezinye izinto ezibalulekile zakulesi sikole.

Okhulumela amaphoyisa KwaZulu-Natal, uColonel Robert Netshiunda, uthe abasolwa abane baboshiwe ngesehlakalo sokugqekeza amakilasi amane akulesi sikole.

Uthe bashise namahhovisi amabili esehlakalweni esenzeke ngoLwesithathu.

"Babekwe amacala okucekela phansi impahla nokugqekeza. Kulindeleke ukuthi bavele enkantolo yaseNew Hanover maduzane," usho kanje. 

UMphathiswa wezeMfundo eKZN, uMnuz Sipho Homuka, ukwamukele ukuboshwa kwabasolwa.

Uthe sibashaqisile isenzo sokushisa isikole nomonakalo odalekile.

"Babanjwe nempahla yesikole okubalwa nesitembu sesikole kanjalo nezinye izinto. Sibonga ukusukumela phezulu kwabezomthetho ukubamba abenzi bobubi." 

Uncome ukubambisana komphakathi namaphoyisa wathi kuthele izithelo ezinhle.

"Izikole yizikhungo okumele siqhubeke nokuzivikela. Akungavunyelwa izigebengu zicekele phansi ikusasa lezingane. Siyaqhubeka nokubambisana nezinhlaka zokuphepha ukuze ukufunda nokufundisa kungaphazamiseki." 

Uthe ukuboshwa kwabasolwa kuthumela umyalezo wokuthi abeba baphinde bacekele phansi impahla kahulumeni, bazobhekana nengalo yomthetho.

UNksz Hlengiwe Mavimbela, ibamba likaSihlalo wekomiti lezeMfundo esiShayamthetho, uthe ushaqekile ngokuthungelwa kwesikole.

Uthe bafuna babhekane nengalo yomthetho abasolwa ngokwenzekile.

"Sizolinda umbiko ogcwele ovela esifundeni uMgungundlovu ngokwenzekile. Sifuna umthetho usebenze."