Luhlinzekwe ngoR2.1 billion ukhetho lwangonyaka ozayo
KUBEKWE uR2.1 billion wamalungiselelo okhetho lohulumeni basekhaya ngonyaka ozayo
Image: Armand Hough / Independent Newspapers
LUBEKELWE isabelomali sikaR2.1 billion, ukhetho lohulumeni basekhaya okulindeleke lubanjwe phakathi kukaNovemba 2026, noJanuwari 2027.
Lokhu kuvele esithangamini sabezindaba izolo eGoli. IPhini lesikhulu esiphezulu seKhomishini yezokhetho kuleli, i-Independent Electoral Commission, uMnuz Masego Sheburi, sithe babeke le mali ukulungiselela ukhetho.
USheburi uthe konke sekumi ngomumo mayelana nalolu khetho.
"Thina simi ngomumo mayelana nokhetho nakuba lungakamenyezelwa usuku oluzobanjwa ngalo. Ngaphambi kokuba kumenyezelwe usuku lokhetho, kuzobhekwa izinto eziningi okubalwa nokuthi alushayisani nezivivinyo zasezikhungweni zemfundo ephakeme nezika-matric."
Uthe banobudlelwano obuhle noMnyango kaMgcinimafa uma kwenzeka bedinga imali ethe xaxa ukube kubanjwe ukhetho.
"Siyazi ziningi izinto ezidinga imali ezweni kodwa sithemba ukuthi sizowuthola uchatha uma kuvela isidingo."