Lufikile olungaliyo kwababhala u-matric

KUPHELA amaphupho kubafundi abaqala izivivinyo zabo zakwa-matric ezweni lonke. Laba bafundi bazovuna abebekutshala eminyakeni engu-12, befunda.

Babalelwa ngaphezu kuka-900 000 abafundi ababhala lezi zivivinyo kuzwelonke, KwaZulu-Natal bangu-195 899. Izivivinyo ziqala ngephepha leComputer Applications Technology kanti abafundi abaningi bazoze babhale ngoLwesine, i-English Paper 3. Izivivinyo ziphothulwa ngasekupheleni kwenyanga ezayo, okusho ukuthi bazobhala inyanga yonke.

NgokoMnyango weMfundo eyisiSekelo, yonke into isimi ngononina, othisha bawenzile umsebenzi wabo manje ingcabha ikubafundi. Abazali banxuswe ukuthi  baseke abafundi ngalesi sikhathi esinzima, esidinga ukuthi behliselwe neminye imisebenzi yasemakhaya abebeyenza, ukuze bagxile ekubhaleni.

Ababhalayo kanjalo nalabo abazobe bebagadile, badonswe ngendlebe ukuthi bangalinge bangene esilingweni sokuzama izindlela ezinqamulelayo zokuphasa, ngokuthi bakopele. Uma bebanjwa bekopela, imiphumela yabo iyothathwa njengento engekho, baphinde bamiswe ekubhaleni izivivinyo iminyaka ecela kwemibili. Kuthiwa lizobe lingafakwa njengoba izivivinyo zizoqashwa ngelokhozi abazozinza zisuka ezikoleni ezithile zize ziyophothulwa.

Imiphakathi nayo iyalelwe ukuba ingalinge ibhodlele ezivivinyweni uma kungukuthi ayeneme ngezinto ezithile ezingathinta ukuhanjiswa kwezidingo. Noma kuvela izinhlekelele, kunezinhlelo ezenziwe ukuqinisekisa ukuthi amaphepha ayafinyelela ezikhungweni zokubhalela. 

Ababhalayo balulekwe ngokuthi babeke phansi umoya bangatatazeli bafunde, bakhulume nabazali nezihlobo uma bethukile, badube okwesikhashana amafoni ukuze bangaphazamiseki.

Sifisela okuhle kodwa ababhalayo. Kwabangeke benze kahle, lisekhona elinye ithuba lokuthi baphinde bazame nangonyaka ozayo. Kunezivivinyo zokuchibiyela ezibhalwa ngoJuni, minyaka yonke. Kwabaya kofuna amatoho, sibafisela inhlanhla.