OwezeMfundo eKZN nezinhlelo ezinqala ngezika-matric
UNDUNANKULU waKwaZulu-Natal, uMnuz Thami Ntuli, ehamba noMphathiswa wezeMfundo uMnuz Sipho Hlomuka besesikhungweni sokugaya amaphepha ezivivinyo zika-matric eThekwini izolo Isithombe: Tumi Pakkies/ Independent Newspapers
Image: Tumi Pakkies/ Independent Newspapers
KWENZIWE izinhlelo eziqinile zokunqanda ukuphazamiseka kokubhalwa kwezivivinyo zika-matric KwaZulu-Natal, eziqala emasontweni ambalwa ezayo.
Lezi zinhlelo zenziwe nguMnyango wezeMfundo esifundazweni, ubambisene nezinhlaka ezehlukene okubalwa omasipala, imiphakathi, abezinhlekelele kanjalo nohulumeni wesifundazwe.
UMphathiswa wezeMfundo, uMnuz Sipho Hlomuka, uthe kuyasiza ukubambisana kwamathimba ehlukene kuhulumeni ukuze kube lula uma sekubhalwa.
UNDUNANKULU waKwaZulu-Natal, uMnuz Thami Ntuli, ekanye noMphathiswa wezeMfundo uMnuz Sipho Hlomuka esikhungweni sokugaya amaphepha ezivivinyo zika-matric eThekwini izolo Isithombe: Tumi Pakkies/ Independent Newspapers
Image: Tumi Pakkies/ Independent Newspapers
Uthe kula mathimba kubalwa omasipala, uMnyango wokuBusa ngokuBambisana neziNdaba zoMdabu kanjalo nezinhlaka zokuphepha.
"Sifuna ukuqinisekisa ukuthi akubi nokuphazamiseka uma sekubhalwa izivivinyo. Asifuni ukuthi uma imiphakathi inezikhalo, bese zikapakela ezikoleni kuphazamiseke izivivinyo," kusho uHlomuka izolo emva kokuhambela isikhungo okugaywa kusona amaphepha ka-matric eThekwini.
Uthe abezomthetho bazobe beqaphe ngelokhozi uma sekubhalwa.
"Zizobe ziqinile ezokuphepha njengoba sisebenza namaphoyisa kanjalo nezinye izinhlaka zokuphepha. Ezinye izinhlelo ezithinta ukuphepha ngeke ngizidalule esidlangalaleni."
Uthe nophiko lwezinhlekelele lumi ngomumo uma kwenzeka kuba nezinkinga ezingaphazamisa ukubhala.
Kuzokhumbuleka ukuthi ngalesi sikhathi sonyaka kuke kube nemvula ehambisana nomoya kuphephuke izikole okugcina sekuthatha isikhathi ukuthi zilungiswe ngenxa yokushoda kwemali.
"Sinazo ezinye izinhlelo esizozenza uma kwenzeka kugadla izinhlekelele ezikoleni. Kunamagumbi angomahamba nendlwana okuyiwona azosiza uma kwenzeka kuba nalesi simo," kusho uHlomuka.
Okunye okugqamile ngukuthi isifundazwe sifuna ukugcina umlando omuhle, wokungaputshuki kwamaphepha ka-matric.
Sekuphenduke insakavukela ukuthi kwezinye izifundazwe kuba nemibiko yokuputshuka kwamaphepha ka-matric. Esifundazweni akukaze kubikwe ngezehlakalo zokuputshuka kwamaphepha.
"Kubalulekile ukugcina isithunzi sezivivinyo ukuze kungabi nongabazane ngemiphumela. Sifuna ngaso sonke isikhathi ukuvikela isithunzi sesifundazwe."
UNdunankulu wase-KZN, uMnuz Thami Ntuli, unxuse abazali ukuthi baseke bonke abafundi abazobhala izivivinyo.
Uthe akungagcini nje ngokuthi kwesekwe abakwa-matric, kodwa nabakwamanye amabanga.
"Siye kobheka lapho kugaywa khona amaphepha ngoba besifuna ukuzenelisa ngokuthi yonke into imi ngomumo. Sinxusa abafundi ukuthi bazibambe ziqine ngalesi sikhathi sezivivinyo eziqala ezinsukwini ezingengaki."
UNtuli uthe abafundi abagxile ezincwadini zabo bazilungiselele ngendlela.
Izivivinyo ziqala ngo-Okthoba 21 nge-Computer Applications Tech P1, zizophothulwa ngoNovemba 26, nge-Agricultural Management Practices neMarine Sciences P2.