Azophendula ngakwenzile selokhu akhethwa amakhansela e-ANC
AMALUNGU esigungu se-ANC, oMnuz Enoch Godongwana, Sihle Zikalala, Gwede Mantashe noNdunankulu wase-Eastern Cape, uMnuz Oscar Mabuyane
Image: X/ANC
ABAHOLI be-ANC kusuka kwesokunxele, uNobhala Jikelele uMnuz Fikile Mbalula, uSihlalo uMnuz Gwede Mantashe, uMengameli Cyril Ramaphosa, iPhini likaMengameli uMnuz Paul Mashatile noMgcinimafa uDkt Gwen Ramokgopa, emhlanganweni oyisipesheli wesigungu esiphezulu eGauteng
Image: X/ANC
AMALUNGU esigungu esiphezulu se-ANC, ehambele umhlangano wale nhlangano eGauteng
Image: X/ANC
KUBHEKWE ukuthi aphendule ngakwenzile selokhu angena esikhundleni ngo-2021, amakhansela e-ANC azonikwa nomkhombandlela azowulandela njengoba kulungiselelwa ukhetho lohulumeni basekhaya, ngonyaka ozayo.
Lo mkhombandlela uzokhishwa nguMengameli Cyril Ramaphosa namhlanje eGauteng njengoba ezobe ekhuluma namakhansela ale nhlangano.
Imigomo azosebenza ngaphansi kwayo, uRamaphosa uyethule emhlanganweni oyisipesheli wezinsuku ezimbili wesigungu esiphezulu sale nhlangano, osongwe izolo.
UNobhala Jikelele we-ANC, uMnuz Fikile Mbalula, uthe uhlelo abazoluthula namhlanje luzogxila ekufukuleni omasipala.
Uthe le nhlangano inamakhansela angu-4 853 kuleli, wathi wonke azobe esemhlanganweni eGauteng, namhlanje.
"Siyinhlangano enkulu ezweni emelelekile kuzona zonke izindawo. URamaphosa uzokhipha umkhombandlela ngohlelo oluzolandelwa kanti amakhansela azobika ezinyangeni ezintathu," kusho uMbalula.
Uthe bafuna uma kunezinselelo zivezwe ukuze intuthuko ifinyelele kubantu.
"Sibheka nendaba yenkinga yamanzi ebhekene nezwe. Siyibeke eqhulwini indaba yamanzi kuleli njengoba phambilini sasibeke ekagesi, egcine ilungisiwe."
UMbalula uthe abanye babethi sisheshise indaba yokuqeda ukungacishwa kukagesi kuleli ngenxa yokuthi kwakuzoba nokhetho.
Uveze ukuthi kodwa lokhu akulona iqiniso ngoba namanje le nkinga ibonakala ixazululeka.
Evula lo mhlangano, uRamaphosa uxwayise ngokuthi amakhansela angasebenzi kumele asuswe ezikhundleni.
Uthe bafuna ukugxila ezinkingeni ezibhekene nomasipala ukuze bazilungise.
"Amakhansela amaningi ayahluleka ukuxhumana ngendlela nomphakathi. Lokhu kwenza kube nemibhikisho, abantu bagxeke i-ANC."
Uthe abantu basuke bebhikisha ngoba basuke bengenalo ulwazi olwenele ngezinselelo ezibhekene nomasipala.
"Kumele singahlonizi ukususa abantu esibajubile abenza izinto ezingafanele, nabazibandakanya enkohlakalweni. Asikwazi ukugcina abantu abantshontshela umphakathi. Abajutshiwe kumele baphendule uma bengawenzi umsebenzi wabo," kusho uRamaphosa.
UMbalula uthe indaba yobugebengu nenkohlakalo iyabakhathaza bewubuholi obuphezulu benhlangano.
Uthe sekuwumlando manje ukuthi kuzokwesekwa abantu be-ANC ababhekene nenkohlakalo.
"Uma kukhona abasaqhubeka nokweseka abantu ababekwe amacala enkohlalalo abahamba izinkantolo bedlubhe izinto zombutho, kumele sibhekane nabo. Sekuwumlando manje ukuthi sizokweseka abantu abakhohlakele kwi-ANC," kusho uMbalula.
UMbalula uthe labo ababika inkohlakalo kuhulumeni kanjalo nakomasipala kumele bavikelwe ukuze bangabulawa.
"Inkohlakalo ayibikwe, bese labo abayibikayo bavikelwe yizinhlaka zomthetho. Lokho kuzokwenza ukuthi baqhubeke nokuyibika ngaphandle kokwesaba," kusho uMbalula.