KUZOBUNJWA ithimba eMnyangweni weMfundo ePhakeme elizokwengamela umsebenzi wokuqinisekisa ukuthi aluphazamiseki uhlelo lokufaka izifundo ezintsha emakolishi amakhono amaTVET, kuqedwe ngalezo okuhlale kukhalwa ngokungaphumi kwemiphumela yezitshudeni ngesikhathi.
Umnyango uhlela ukuqeda ngezifundo ezaziwa ngeNATED (National Accredited Technical Education Diploma), uqale ezinye i-Occupational Qualifications. Izifundo zeNATED zifaka i-Financial Management, Human Resource Management, Business Management, Legal Secretary, Management Assistant, Marketing Management nezinye. I-Occupational yona ifaka izifundo ezithinta izinto ezehlukene okubalwa ukucwala izinwele, ezithinta ulwandle, ezithinta amabhanoyi, ukupheka, ukulungiswa kwezikebhe nokuzakha nezinye.
Lokhu kuvezwe nguNgqongqoshe walo mnyango, uMnuz Buti Manamela muva nje, ekhuluma nabezindaba ngezinhlelo zalo mnyango zokwenza lawa makolishi ahehe intsha njengoba kunenkinga yokushoda kwezikhala emanyuvesi namakhono adingwa ngumnotho wezwe.
UManamela uthe okubalulekile ngukuthi intsha kumele ifunde izinto ezintsha ezizokwenza ukuthi ikwazi ukuqala amabhizinisi.
"Sihlela ukujuba ithimba ukuze liqinisekise ukuthi akubi nokuphazamiseka uma sekuqalwa izifundo ezidingeka kakhulu wumnotho. Leli thimba lizosebenza nezinhlaka ezehlukene okubalwa abezimboni, amakolishi nosomabhizinisi okuyibona abazosho izinto ezidingeka kakhulu ezweni," kusho uManamela.
Kuhlale kukhalwa ngokuthi akukwazi ukuthi izitshudeni emakolishi zingenza imikhakha efana naleyo eyenziwa emanyuvesi ekubeni ngabe zenza imikhakha edingwa umnotho.
UManamela unxuse izitshudeni ukuthi zibe yingxenye yokubeka umbono ngezikufuna kufundwe kulawa makolishi.
"Asifuni uma sekuba nalezi zinguquko bese kuphazamiseka ukufunda. Ithimba elizojutshwa lizobheka nokuthi ikhona ingqalasizinda efanele yokufundela nokuthi malini ezodingeka."
Uthe uyazazi ezinye zezinselelo ezibhekene namakolishi kuleli.
"Kunenkinga yezinga eliphezulu labalaxaza izifundo benza unyaka wokuqala. Lezi zitshudeni zigcina ngokungaziphothuli izifundo zazo, ikakhulu zeNATED."
Uthe amaSETA azoba yingxenye yalo lonke uhlelo ukuze kube nokusebenzisana namakolishi.
"Sifuna intsha ize emakolishi kunokuthi ijahe ukuya emanyuvesi. Uma kunazo zonke izinsiza intsha izoheheka. Asifuni icabange ukuthi amakolishi indawo yokulahla labo abasuke bechithwe amanyuvesi," kusho uManamela.
Uveze nokuthi zibalelwa ngaphezu kuka-527 000 izikhala zokufunda ezikhona emanyuvesi angu-50, zangonyaka ozayo.
Emanyuvesi zibalelwa ku-200 000 kanti izitshudeni zinxuswe ukuthi zifake nezicelo emaTVET, zingawashalazeli.
Related Topics: