Zingena zilakanyana izicelo zoxhaso lwangonyaka ozayo kwaNSFAS

LUTHE luvulwa izolo uhlelo lokufakwa kwezicelo zoxhaso esikhwameni iNational Students' Financial Aid Scheme (NSFAS), kwafakwa izicelo ezibalelwa ku-17 000 zangonyaka ozayo. Kulezi zicelo ezibalelwa ku-15 000, zivela kulabo abathola izibonelelo zakwaSassa.

Abesilisa bangu-5 000 abafake izicelo, abesifazane babalelwa ku-12 000.

Lezi zibalo zivezwe yibamba lesikhulu esiphezulu seNSFAS, uMnuz Waseem Carrim, njengoba bekuthulwa lolu hlelo lokufaka izicelo zangonyaka ozayo ePitoli.

"Ezicelweni esizitholile sizobhekisisa olunye ulwazi noMnyango wezaseKhaya. Labo abahola isibonelelo bona nakanjani bazoluthola uxhaso ngoba bavela emindenini ehlwempu," usho kanje.

Unxuse abafuna uxhaso ukuthi basheshe bafake izicelo zoxhaso ukuze basheshe bathole izimpendulo.

UDkt Nomusa Dube-Ncube oyiPhini likaNgqongqoshe eMnyangweni weMfundo ePhakeme - othule lolu hlelo - uthe kugcinwa ngoNovemba 15, 2025, ukwamukelwa kwezicelo.

Uthe bafuna ukuthi lezi zicelo zisheshe zifakwe ukuze kutholakale izimpendulo ngokushesha.

"Asifuni ukuthi abafuna uxhaso bayeke kuze kube umzuzu wokugcina. Yingakho sisheshe saluvula uhlelo ukuze basheshe bafake izicelo," usho kanje.

Uthe njengoba lolu hlelo beluthulwa, bazibonele izinselelo ezibhekana nabafaka izicelo njengoba kusetshenziswa ubuchwepheshe.

"Sifuna ukubona lapho kunezinselelo khona ukuze sikwazi ukusheshe sizilungise. Izicelo zifakwa ku-myNSFAS portal kusetshenziswa i-internet. Abafake izicelo bazokwazi ukuthola ulwazi lwezinto ezidingekayo uma sebefake izicelo."

Okunye ngukuthi bazokwazi ukubona ukuthi isicelo sabo sesikusiphi isigaba.

Abafaka izicelo kulesi sikhwama bahlale bekhala ngokuthi abazazi izicelo zabo ukuthi zibhajwaphi njengoba abanye kuze kuphele nekota yokuqala beqalile ukufunda bengazi noma bayaluthola uxhaso noma abalutholi.

I-NSFAS iveze ukuthi isebenzisana nezinye izinhlaka okubalwa neminyango kahulumeni okubalwa nomqoqi wentela, ukubheka labo abakokotela ulwazi uma befaka izicelo.

Okunye okuvelile ngukuthi abakude namadolobha noma abangenayo i-internet bangaya emahhovisi eNYDA ukuze basizakale ngokufaka izicelo.

"Sinxusa omasipala, umphakathi, imitapo yolwazi nabama-internet cafe ukuthi basize abafaka izicelo zoxhaso. Ngaleyo ndlela kuzobalula ukuthi izicelo zabo zisheshe zifike," kusho uCarrim. 

UNgqongqoshe weMfundo ePhakeme, uMnuz Buti Manamela, ekhuluma ngamalungiselelo angonyaka ozayo ezikhungweni zemfundo ephakeme, uthe ngeke silulwe isikhathi sokufaka izicelo ngoba bafuna ukusheshe bakhiphe izimpendulo.