Ithembisa okungcono iMeya entsha yaKwaDukuza
IMEYA entsha yaKwaDukuza uMnuz Siduduzo Gumede ekanye noSomlomo uNkk Dolly Govender
Image: KwaDukuza
KULANDWE owake waba yiMeya yesiFunda, iLembe, uMnuz Siduduzo Gumede ukuba azohola uMasipala waKwaDukuza obese kuphele isikhashana ungenayo imeya.Ukuqokwa kukaGumede kwenzeke emhlanganweni wamakhansela obukade uKwaDukuza Town Hall, izolo.
UGumede ungena ngemuva kokushenxiswa kukaloyo obekade eyimeya kulo masipala, uMnuz Ali Ngidi owahoxiswa naloyo owabe eyiphini lakhe, uMnuz Njabulo Cele.UNgidi okungaphelanga ngisho unyaka ehola lo masipala wayekade engene esikhundleni sikaNksz Lindiwe Nhaca.
Izicathulo zagcwala udaka kulaba ababili ngasekuqaleni kukaJulayi ngemuva kokuba kwasabalala izinsolo zokuthi bafake inhlangano yabo i-African National Congress (ANC) ehlazweni.Basolwa ngokusebenzisa budedengu izimali zikamasipala nokuqashwa kwezimoto zikanokusho nokusebenzisa imali kubaqashi abazimele.
UGumede akathuki isisinga ekuholeni umasipala kwazise ngo-2016 waqokelwa kwesokuhola isiFunda iLembe waze waphuma ngo-2021.Ekhuluma lapha uGumede uthe uzizwa ethobekile kakhulu ngokuthola ingqayizivele yethuba lokuthi ahole uMasipala waKwaDukuza.Uthembise ukuthi bazoqhubeka nokusebenzisana nomphakathi ngenhloso yokuqinisekisa ukuthi konke kuhamba kahle.''Okubalulekile ukuthi sisebenzele ukuthi umphakathi uthola izinsiza zawo. Asikholelwa ekutheni izinkinga zingaphezulu kukamasipala,'' usho kanjena.
Uthe bazimisele ngokuthi balungise amaphutha abonakale eba khona. Uthe luzoba seqhulwini udaba lokulungiswa kwenkinga kagesi.''Sizokwenza konke okusemandleni ngenhloso yokulungisa inkinga kagesi ekhona kule ndawo,'' usho kanjena.
Ukhulume nangokubaluleka kokuba bakhelwe izindlu abantu baKwaDukuza namaphethelo. Uthe bakholelwa kakhulu ekutheni kumqoka ukuba abantu bathole izindlu ezisemgangathweni.''Sizosebenza ngokuzikhandla ukuze abantu bazithole izidingo zabo. Siyazi ukuthi abantu bazidinga kangakanani izindlu. Yingakho ke udaba lwezindlu sizokwenza isiqiniseko sokuthi siyalisebenza,'' usho kanjena.
Ugcizelele kakhulu ukubaluleka kokuba zisatshalaliswe ezingxenyeni ezahlukene izinsiza ngoba abantu bayazidinga. "Akumele kube nezaba uma kukhulunywa ngodaba lokuhanjiswa kwezidingo kubantu kodwa kumele bazithole,'' usho kanjena.Ugcizelele ukuthi ukubambisana yikhona okungadala ukuthi izinto kube lula ukuzenza kulo masipala.