Indida kubulawa induna nomkayo kwalimala kanzima usana
INDUNA yezinsizwa yakwaMpofana, eNhlazuka, uSizwe Msomi ebulawe ngoyaba lwezinhlamvu ngeSonto
Image: Sithunyelwe
USADIDEKILE umphakathi wasesigodini saKwaMpofana, eNhlazuka, eRichmond, ngokubulawa kwenduna yezinsizwa nomkayo, kwalimala kanzima usana lwabo olunezinyanga ezimbili ngeSonto ebusuku.
Kuthiwa uMnuz Sizwe Msomi nomkakhe uNkk Nelisiwe MaMkhize Msomi bavinjezelwe wumuntu ongaziwa emgwaqweni eseyongena kwakhe ngabo-8 ebusuku.
Induna ibiphuma emcimbini wokunyathela kweNkosi uSiphakanyisiwe Mkhize esigodini saKwaMpofana. Umcimbi ubusenkundleni yezemidlalo endaweni.
Umthombo ocele ukungadalulwa ngenxa yokwesaba, uthe inkosi ibizonyathela okokuqala kulandela ukungena esihlalweni esashiywa nguyise owakhothama Inkosi Moyeni Mkhize.
"Induna beyikwabaphambili ekuhlelweni komcimbi wokunyathela kwenkosi. Umcimbi uqale ngabo-10 ekuseni waze waphela ngo-3 ntambama. Kuthe emuva kwalokho kwabe sekunandisa amaciko obekukhona kuwo uMbuzeni Mkhize neThwasa Lekhansela," kusho umthombo.
Uthe uMsomi usale eqoqa waze waqeda ngabo-8 ebusuku. Umkakhe ubekwabebelungiselela izihambeli ukudla.
"Kuthe sebehamba, umkakhe ubengaphambili egone ingane yabo enezinyanga ezimbili. Enye eneminyaka eyisikhombisa ibingemuva nomngani wenduna. Bavinjwe wumuntu obemi emgwaqweni kwaba sengathi kukhona afuna ukukusho kanti yinkabi evele yavulela ngenhlamvu ngesibhamu esikhulu. Kuthiwa ize yasondela izokwenza isiqiniseko sokuthi ibatholile. Ingane ngemuva nomngani wenduna babaleke bangena esikhotheni. Inkabi ibaleke ngemoto emhlophe eyiveni," kuqhuba umthombo.
Uthe usana ludubulekile phezu kwemizamo kanina yokuluvikela futhi lusesimeni esibucayi esibhedlela.
Umthombo uthe wumuntu obeqonde ukubulala ngoba akathathanga lutho.
Uthe namanje basazibuza ukuthi ngabe yini imbangela yalokhu kuhlasela okushiye umphakathi uthuthumela.
“Asazi noma kuhlobene nesikhundla sakhe sokuba yinduna yezinsizwa yini. Phela umphakathi ubumthandela ukuthi ubenesibindi - into uma ibheda iyabheda. Yikho ebethandwa. Abanye bese bephakamisa ukuthi abe sebuholini bezombusazwe emphakathini uma sekuyiwa okhethweni lohulumeni basekhaya ngonyaka ozayo manje asazi ukuthi nalokho bekungaba yimbangela yini,” kusho umthombo.
Kuze kwashaya isikhathi sokushicilela amaphoyisa esifundazweni ethi asalinde imininingwane egcwele ngesigameko esiteshini saseRichmond.