AbaseSwatini bathekela ulwazi esiShayamthetho sase-KZN

AVAKASHELE KwaZulu-Natal amalungu esiShayamthetho saseSwatini, ukuzothekela ulwazi kuphinde kuboniswane ngendlela okumele kuphathwe ngayo iziShayamthetho.

La malungu azovakashela isiShayamthetho, eMgungundlovu kusuka ngoLwesine kuze kube wuLwesihlanu.

USomlomo wesiShayamthetho, uNksz Nontembeko Boyce, uthe amalungu alezi ziShayamthetho azobe ecebisana ngolwazi lwezinto ezehlukene okubalwa nokusebenza kwalezi zindlu ezishaya umthetho.

Uthe bazobe becebisana ngaphansi kwenhlangano, iCommonwealth Parliamentary Association (CPA), abayingxenye yayo nabaseSwatini.

"Ithimba laseSwatini lizobe lihlanganisa iSenate, iPhini likaSomlomo kanjalo namalungu esiShayamthetho. Sizobe sibonisana ngezinto ezehlukene okubalwa nokusebenza kweziShayamthetho kanjalo nokuphathwa kwazo," kusho uNksz Boyce. 

Uthe lokhu bakwenza ngaphansi kwezinqumo ezathathwa emhlanganweni wanyakenye, owawuseNew South Wales, e-Australia.

Umongo walo mhlangano wanyakenye wawuthinta eyokubonisana ngezithinta intando yabantu.

Isolezwe lithole ukuthi babalelwa ku-70 abaseSwatini abazohambela kulesi sifundazwe kanti bazobe behlobe ngemvunulo yakuleliya lizwe.

IsiShayamthetho sakhiwe amaqembu amane, okuyi-MK, ANC, IFP, EFF ne-NFP.

IMK iyona eyathola izihlalo eziningi kodwa ayikho ebuholini besifundazwe. Isifundazwe sibuswa ngokuhlanganyela yi-IFP, DA, NFP ne-ANC, kuhulumeni wokubambisana kwamaqembu.

I-IFP iyona ephethe izintambo kwesikaNdunankulu wesifundazwe, i-ANC iphethe esikaSomlomo wesiShayamthetho. I-DA iphethe esePhini likaSomlomo wesiShayamthetho.