Kufane nengqophamlando ukudluliselwa kwesiShayamthetho sasoLundi kokaButhelezi

NKOSIKHONA CELE

SESISEZANDLENI zoMnyango wezokuBusa nokuBabisana neziNdaba zoMdabu isakhiwo esidala sesiShayamthetho sasoLundi. Lokhu kuvele ngoLwesibili, ngesikhathi uMphathiswa wezeMisebenzi yoMphakathi neNgqalasizinda, uMnuz Martin Meyer, esayina isivumelwano sokusebenzisana noMnyango wezokuBusa nokuBambisana KwaZulu-Natal oholwa nguMfu Thulasizwe Buthelezi.

Lesi sivumelwano sisayindwe emahhovisini ezoMsebenzi yoMphakathi aseMayville. Kuvelile lapha ukuthi inhlosongqangi yokusebenzisana phakathi kwale minyango kuhambisana nokuhlomula kwabantu baKwaZulu-Natal ngezindlela ezahlukene.

UMeyer umemezele ngokusemthethweni ukudluliselwa kwalesi sakhiwo esidala.

Lokhu uthe kwenzeke ngemuva kokuba kube nokuxoxa okuhle nokuthele izithelo ezinhle phakathi kwale minyango yomibili.

"Sithathe isinqumo sokuba sisidlulisela ngokumsethethweni kuMnyango wezokuBusa nokuBmabisana isakhiwo esidala sesiShayamthetho sasoLundi,'' kugcizelela uMeyer.

Lezi zindaba uzishayele elikhulu ihlombe uButhelezi, wathi lokhu kuyefana nje nengqophamlando.

Uthe ukwamukelwa kwalesi sakhiwo kusho lukhulu kubona futhi kusho nokufezeka kwephupho lomsunguli we-IFP, iNkosi Mangosuthu Buthelezi. Lesi sakhiwo usichaze njengegugu KwaZulu-Natal.

"Kusho lukhulu lokhu okwenzeka namhlanje. Kusho ukuqopheka komlando uqobo lwawo. Sijabule kakhulu ngokuthi lokhu kugcine kwenzeka,'' usho kanjena.

Uthe leli yigxathu elikhulu kwazise uLundi "yindawo enomlando omude nonothile."

''Lokhu kuchaza nokuthi umnotho wasoLundi ngeke uze ufadalale kodwa kunalokho uzobonakala udlondlobala okuyinto ebalulekile kakhulu nesidinga ukuyibona yenzeka kule ndawo,'' esho.

UButhelezi umemezele nokuthi angeke besaqhubeka nokusiqasha isakhiwo esiseMgungundlovu, ngokwenza njalo uthe bazokwazi ukuthi bonge imali elinganiselwa ku-R72 million.

"Leyo mali esizoyonga sizoyisebenzisela okunye okubalulekile okufaka phakathi ukubhekelelwa kwezidingo zamakhosi nezinduna," esho.

Kuqinisekisiwe lapha nokuthi kungekudala kuzoqala ukulungiswa kwalesi siShayamthetho okuvele ukuthi kuzodinga imali eshisiwe.

Lapha kuvelile nokuthi kunengwadla yezakhiwo zikahulumeni ezilinganiselwa ku-320 okuhlala kuzona abantu ngokungafanele. Lena yinkinga uMeyer athe isezingxenyeni ezahlukene zeKwaZulu-Natal, wathembisa ukuthi bamatasa bafuna ukuthola isisombululo sayo ngokushesha.