Kukhona okusina kulijeqeza iphoyisa elisolwa ngokuba nenkampani yonogada
Limisiwe iphoyisa elibonakale liphithuzela neqembu le politiki ligqoke nemifaniswano yalo.
Image: Sigciniwe
UKhomishana wamaPhoyisa KwaZulu-Natal uLieutenant General Nhlanhla Mkhwanazi uyalele uKhomishana wesiFunda iSilo uCetshwayo ukuba ahoxise ngokushesha iphoyisa elinguConstable esiteshini samaphoyisa eNtambanana kuyo yonke imisebenzi njengoba kusaphenywa ngezinsolo zokubandakanyeka kwakhe kwezombusazwe.
UConstable okukhulunywa ngaye ubonakale egqoke izingubo zeqembu lezepolitiki, futhi ezibandakanya nezenzo zezepolitiki zalelo qembu.
Amaphoyisa kulindeleke ukuthi angathathi hlangothi ngaso sonke isikhathi. Noma yikuphi ukuzihlanganisa neqembu lezombusazwe yiphoyisa kunamandla okuletha igama lenhlangano ehlazweni.
UKhomishana wesiFundazwe uzophinde axhumane ne-PSIRA ukuze aphenye ngezinsolo zokuthi yena lo Constable unenkampani yonogada eyenza i-VIP Protection Services phakathi kweminye imisebenzi yezokuphepha.
Alikho iphoyisa elivunyelwe ukuzibandakanya nezokuphepha, izimboni zotshwala noma zamatekisi. Amalungu omphakathi ayanxuswa ukuthi abike wonke amaphoyisa azibandakanya kwezombusazwe kanye namabhizinisi ezinja abeka engcupheni ubuqotho boMbutho Wamaphoyisa aseNingizimu Afrika.