ISABC ivale umethuli wezindaba kubhimba inkulumo
ISABC ivale umethuli wezindaba exabana noDkt Mamphela Ramphela ngodaba lwaseGaza.
Image: Karen Sandison/IndependentNewspapers
Ikhishwe emoyeni umethuli wezindaba obonakale exakazisana noDokotela Mamphela Ramphela ngodaba lwaseGaza.
Lokhu kusuke engxoxweni phakathi kwentatheli yakwa-SABC nomdidiyeli wezindaba uJuliet Newell nesishoshovu esasilwa nobandlululo uRamphele. Ngesikhathi bexoxa, uNewell ubuze uDkt Ramphele ngokufanisa izehlakalo zokubulawa kwabantu basePalestine nokuqothulwa kwesizwe, ebuza: "Anikuboni njengokuvusa inkanuko?" "Ukuqothulwa kwesizwe kwenzeka, futhi kusazoqhubeka kwenzeke ngezindlela ezehlukene...Ngabe kufanele silinde ukufa kwezigidi ukuze sikubize lokhu okuyikho? Uma silinda ukufa kwezigidi eziyisithupha, isintu asinalo ilungelo lokuzibiza ngomuntu. Ukuba ngumuntu kuwukuzwa ubuhlungu bawo wonke umuntu njengokungathi uzizwa wena," kuphendula uRamphele.
Le ngxoxo use omkhulu umsindo wabomkhankaso wePalestine Solidarity kanye nezishoshovu zabezindaba, ezisole le ntatheli ngokunanela amaphuzu okukhuluma akwa-Israel kanye nokubukela phansi unya lwaseGaza.
Inhlangano yezokusakaza yaseNingizimu Afrika (i-SABC) ikhiphe isitatimende iveza ukuthi lo methuli usemisiwe.
"ISABC iyalwazi udaba oluthinta ukuziphatha komunye wabethuli bayo bezindaba, engxoxweni noDkt Mamphela Ramphele. Ngaleyo ndlela, abaphathi bezindaba ze-SABC bathathe isinyathelo ngokushesha ngokuhambisana nenqubo yangaphakathi ye-SABC, kanti umethuli okukhulunywa ngaye okwamanje akahlelelwe ukusebenze. I-SABC igqugquzelwe wuhlaka lomthetho olwahlukene oluphoqelela ukuthotshelwa koMthetho Wezokusakaza 4 ka-1999 kanye nenqubomgomo yayo yokuhlela eqinisekisa ukunikezwa kwemibono eminingi kanye nezinhlobonhlobo zezindaba nolwazi.