Izindaba

UCachalia usole ukhomishana wamaphoyisa ngokuphaphalaza ngodaba lwamadokodo

Nonkululeko Nhlapo|Published

Ibamba likangqongqoshe wamaphoyisa uSolwazi Firoz Cachalia

Image: X

Ibamba likaNgqongqoshe wamaPhoyisa uFiroz Cachalia usole uKhomishana kaZwelonke wamaphoyisa  ngokuphaphalaza mayelana nethimba eliphenya ngokubulawa kosopolitiki.

Uthi "ukhathazekile" uma ebheka ukuphawula kukaGeneral Fannie Masemola kwabezindaba mayelana nokukhishwa kwamadokodo azobuyiselwa eKZN. UCachalia ubona lolu daba lungafanele ukusetshenzwa ngaphandle kweKhomishini kaMadlanga ezayo. Manje ufuna umbiko ogcwele kuMasemola.

UMasemola umemezele ngoLwesine ukuthi amadokodo okukhulunywa ngawo azobuyiselwa ophikweni ephuma ehhovisi lePhini likaKhomishana wezokuVikelwa kobugebengu uShadrack Sibiya.

UChacalia uzwakalise ukukhathazeka ngaleso siphakamiso ngaphambi kokuba ikhomishana ephenya ngokugxambukela kwezombusazwe ohlelweni lwezobulungiswa bobugebengu ikwazi ukuphenya izindaba ezithinta ithimba elijutshiwe.

Okhulumela uNgqongqoshe uKamogelo Mogotsi ukhiphe isitatimende sikaCachalia esithi; "Ngiyabona ukuthi izinsolo ezenziwe mayelana nethimba elibhekele ukubulawa kwezepolitiki zibalulekile emphakathini. Ithimba eliphenya ngokubulawa kosopolitiki yilo eliphakathi kwezinsolo ezenziwe nguKhomishana wesifundazwe futhi lizodingidwa yiKhomishini. Ngakho-ke kuyakhathaza ukuthi kuthathwe izinyathelo maqondana nalolu daba ngaphambi kokuthi ikhomishana ithole ithuba lokufaka isicelo sokuthi ifake ithimba eliphenyayo.”