Kuzoncishiswa amanzi aphakelwa omasipala
Kubikwa ukuvalwa kwamanzi okuhleliwe okuzokwenziwa eThekwini
Image: Oupa Mokoena / Independent Newspapers
KUZONCISHISWA amanzi komasipala abathathu KwaZulu-Natal, kusuka ngenyanga ezayo yisikhungo esiphakela amanzi izimboni nakomasipala, uMngeni-uThukela Water.
Lesi sikhungo sikhiphe isaziso sokuthi kusuka ngenyanga ezayo, kuzoncishiswa amanzi awumthamo ahlinzekwa kuMasipala weTheku, uMsunduzi kanye noMasipala wesifunda uMgungundlovu.
Isitatimende esikhishwe yilesi sikhungo, sithe lolu hlelo luhambisana nemibandela yemvume yokudonsa amanzi ekhishwe nguMnyango wezaManzi..
"Ngokwale mibandela, uMngeni-uThukela Water akumele udlule esikalweni esibekiwe sokudonsa amanzi emadamini. Lokhu kwenzelwa ukuqinisekisa ukuthi amanzi ayatholakala uma kwenzeka kuba nesomiso. UMnyango wezaManzi wethula uhlelo lokuncishiswa kwamanzi adonswa emadamini nyakenye kepha wabuye walumisa ngenxa yemvula enkulu yasehlobo eyaholela ekutheni amadamu agcwale achichime."
Sithe kuze kube manje, uMngeni-uThukela Water ubulokhu uhlinzeka ngamanzi adlula inani okuvunyelwene ngalo kulabo masipala abathathu abathintekayo.
"Nakuba izinga lamanzi emadamini lisatshengisa uzinzo, kubalulekile ukuthi kuthathwe izinyathelo zokonga amanzi ukuze anele uma kwenzeka izulu lomisa esikhathini esizayo. UMngeni-uThukela Water uzibophezele ekusebenzisaneni nomnyango, omasipala kanye nomphakathi ukuze kongiwe amanzi."
Kuke kwaba nezikhalo ezivela emnyangweni mayelana namanzi aphelela emhlabathini ngenxa yokuvuza angafinyeleli kubantu.