Umlando udokotela wesifazane onsundu evula isibhedlela #Imbokodo #Intandokazi

KUZOQOPHEKA umlando ngenyanga ezayo, uma uDkt Nomcebo Mthembu, owaziwa ngokuba wungoti kwezocansi, aphinde abe wumsunguli weNdoni SA, eseba owokuqala wesifazane webala elinsundu ukuvula isibhedlela sokwelashwa ngokomqondo esithi yena. 

Lesi sibhedlela, iMedilution Wellness Retreat esiKwaGengeshe eRichmond kulindeleke ukuthi sivulwe maphakathi noSepthemba.

Elandisa Isolezwe ngaso uthe, sizosiza ngosizo lokwelashwa kulabo abaphethwe yizifo ezehlukene ezithinta umqondo, phakathi kwazo kukhona ukhwantalala, ingcindezi nezinye.

Uthe isibhedlela sizokwamukela iziguli eziyizingane ezinezinkinga zomqondo ezidalwe wukuhlukumezeka emakhaya, esikoleni nokunye.

“Sizophinde samukele neziguli ezingabantu abadala ezibhekene nezinkinga ezehlukene emakhaya, emsebenzini, othandweni, ababhekene nesahlukaniso emshadweni nokunye,” kusho uDkt Mthembu.

Uqhube wathi ukusebenza kwalesi sibhedlela kuzothi ukwehluka kunokwezinye izibhedlela ezijwayelekile njengoba kuzoxuba izindlela zokwelapha ngokwasentshonalanga kanjalo neokwesintu.

Ubuye waveza nokuthi kuzoba khona imisebenzi (activities) ezokwenza ukuthi abantu bakhumbule ukuthi bangobani.

“Okokuqala nje, indawo okwakhiwe kuyo isibhedlela iyodwa, iyawelapha umqondo ngoba inezintaba namagquma okuhle okukuthatha kukubeke. Kukhona nomfula oseduze, uMkhomazi, nawo odlala eyawo indima ukukubuyisela emvelweni,” kusho uDkt Mthembu.

Uthe nezakhiwo zesibhedlela bazenze ngendlela yokuthi isiguli esingena phakhathi, siphume selaphekile emphefumulweni.

“Kukhona amagumbi afulelwe ngotshani, kube khona asindwa ngobulongwe phansi nokuyinto okuthi uma eyibona umuntu, azikhumbule ukuthi ungubani uphumaphi. Lokhu kuphinde kudlale nendima enkulu kwezempilo njengoba ubulongwe bubodwa, bunamakhemikhali awusizo emzimbeni womuntu,” usho kanje.

Echaza ngezinye zezinto ezizokwenziwa yiziguli kulesi sibhedlela uthe, kuzoke kube khona isikhathi lapho umuntu ephuma khona nodokotela wakhe wengqondo bayosusa ukhula engadini bebe bexoxa.

“Uma beqeda lowo msebenzi udokotela uzobe esehlala phansi nesiguli, esibuza imibuzo efana nokuthi kusho ukuthini ukususa ukhula, uma sesikuthatha sikubuyisela kweyaso impilo lokhu abazobe bekade bekwenza engadini,” kusho uDkt mthembu.

“Ngizinikele emsebenzini wokwelapha imiqondo, ukubuyisa isithunzi kulabo abalwa nezinkinga zomqondo,” usho kanje. Esikhathini esiningi abantu bahlukumezeka buthule, besaba ukwahlulelwa. Bengifuna ukuthi ngiqhamuke nento ehlukile lapho ukwelashwa kungekho ngomtholampilo kuphela kodwa kufake isiko kuphinde kuthi thasi nemvelo,” usho kanje.

Uthe njengomuntu wesifazane webala elinsundu, kuphoqe ukuthi alwe ngokuphindaphindiwe ukuveza izindlela ezintsha zokwelulekwa ngokomqondo, nabebala elimnyama abasele ngaphandle kuzo.  

Angu-57 amathuba omsebenzi azodaleka ngokuvulwa kwesibhedlela, kuwona kukhona odokotela bazozonke izifo, abeluleka ngokomqondo, abahlengikazi, abahlanzi, nabanye kanti sizokwazi ukwamukela abantu abangu-100 ngesikhathi, abangu-60 abadala, bese kuba yizingane esezithe ukukhula (teenagers) angu-40.

Udalule ukuthi enye injongo yakhe ngesibhedlela wukuthi athathe enye yemali esizoyenza, ayiphonse esikhwameni seNdoni SA, ukuze kuqhubeke umsebenzi wokukhulisa intsha yaseNingizimu Afrika ukuthi iqhubeke iziphathe kahle.

“Ngalesi sibhedlela, ngifuna ukuthi kube khona umnikelo ophumayo uye kwiNdoni ukuze umsebenzi wayo, obandakanya ukuholelwa kwabasebenzi abenza umsebenzi wayo uqhubeke,” usho kanje.

UDkt Nomcebo akamusha kwezokwelapha njengoba eseneminyaka engaphezu kuka-20 eyibambile emkhakheni wezokwelapha. Usebenze iminyaka ezibhedlela zikahulumeni kanjalo nakwezizimele ngaphambi kokuba azivulele eyakhe indawo yokusebenza iMedilution ngo-2017 enamagatsha amabili eHillcrest naseRichards Bay, lapho elapha khona iziguli ngamakhambi asentshonalanga kanjalo nezindlela zesintu.

Wazakhela udumo iminyaka eyisishiyagalombili emsakazweni iGagasi FM ohlelweni no-Alex Mthiyane lapho ayebeka khona izinto ngembaba uma ekhuluma ngezithinta ikamelo. Sekuphele iminyaka emithathu adlulela kuKhozi FM, lapho esaqhubeka khona nezinkulumo ezifanayo.