Iziguli zibhikishele ukumiswa kukadokotela wenhliziyo
BEBEPHETHE izingqwembe ezinemibhalo ehlukene ebebebhikishela ukumiswa kukaDkt Ntando Duze esibhedlela iLife Westville, izolo
Image: uMBHIKISHO
BABHIKISHE ngaphandle kwesibhedllela esizimele, iLife Westville bevutha bengabaselwe, bekhala ngokumiswa isigubhukane kukadokotela wenhliziyo osezakhele igama emphakathini.
Kuvela ukuthi ezinye iziguli zakulesi sibhedlela zisale dengwane njengoba kumiswe uDkt Ntando Duze, okuthiwa usenokhakhayi oluqinile ekusebenzeni njengengodokotela wenhliziyo. Izolo kube nombhikisho befuna izimpendulo kulesi sibhedlela ngokumiswa kukaDuze.
Ababhikishi bebephethe izingqwembe ebezinemibhalo ehlukene. Eminye yayo ibifundeka kanje: Hlukanani noDuze akanacala! Isono sikaDuze ukuba nsundu! Okwani ukucindezelwa kodokotela abansundu eWestville?
Omunye wabahleli bale mashi, uMnuz Sandile Madlala, uthe baphume ngobuningi ukuzovikela igama likadokotela abakholwa ukuthi umiswe kungafanele esibhedlela.
''Kukhona abathile abafuna uDuze ahambe ngaphakathi kulesi sibhedlela, ngeke sikuvume lokho ekubeni esiza abantu abaningi kangaka abanesifo senhliziyo,'' usho kanje.
Umthombo ongaphakathi esibhedlela, uveze ukuthi zidinwe kakhulu iziguli ngokumiswa isigubukane kukaDkt Duze.
"Zicasukile kakhulu iziguli zifuna izimpendulo ngokumiswa kukaDuze. Zikholwa ukuthi kukhona abathile abamdinga ehambile ngoba enomthamo omkhulu weziguli futhi iziguli eziningi zithembele kuyena,'' usho kanje.
Omunye umthombo ongaphakathi uthe ukumiswa kukaDuze kumayelana nabanye abangaphakathi abafuna izinyawo zakhe zigcwale udaka.
''Konakele, bamfuna ehambile uDuze, banomona ngendlela asebenza ngayo,'' kusho umthombo.
ABANYE bebekhala ngokucindezelwa kodokotela abansundu kulesi sibhedlela
Image: UMBHIKISHO
Omunye umthombo osondelene nalolu daba, uveze ukuthi kuneziguli ezithengiwe ukuze kungcoliswe igama likaDuze, okuholele ekutheni agcine esemisiwe zikhala ngokusebenza kwakhe.
Kuvela ukuthi kunomunye wodokotela ohamba phambili ekukhandweni kwetulo lokumiswa kukaDuze.
Ukumiswa kukaDuze kuvela ukuthi sekuze kwafinyelela nakumkhandlu iHealth Professions Council of Southern Africa ngamafuphi iHPCSA.
Kuvela nokuthi kunamacala uDuze asewavulele abangaphakathi ebasola ngokudicilela phansi igama lakhe. Isolezwe linencwadi efungelwe yesinye seziguli siqinisekisa ukuthi besikade sisetshenziswa ngomunye wodokotela abangaphakathi ukuthi kudicilelwe phansi igama likaDuze.
Ethintwa Duze, uvumile ukuthi umisiwe kodwa wathi akathandi ukuphawula ngalolu daba ukuze kungaphazamiseki uphenyo oluqhubekayo ngaye. Kodwa ukuqinisekisile uthe ufuna kuvele iqiniso ngabamkhandela uzungu.
Umxhumanisi walesi sibhedlela nomphakathi, uMnuz Mark Raptie, uthe lolu udaba olubucayi abangekho esimweni sokuthi bangakwazi ukuphawula ngalo okwamanje.